Sablyaçılarımız Bolqarıstanda güclərini sınayıblar
Bakı, 7 fevral, AZƏRTAC
Bolqarıstanın Plovdiv şəhərində qılıncoynatmanın sablya növü üzrə gənclər arasında dünya kubokunun mərhələ yarışına yekun vurulub.
Azərbaycan Qılıncoynatma Federasiyasının mətbuat xidmətindən AZƏRTAC-a bildiriblər ki, Murad Əkbərov (4 qələbə), Maqsud Hüseynli (4 qələbə), Ayxan Xasıyev (3 qələbə) və Saleh Məmmədov (2 qələbə) qrup mərhələsini uğurla adlayıblar.
Təmsilçilərimizdən Murad Əkbərov və Maqsud Hüseynli pley-offda 64-lüyə yüksəlməyi bacarıblar. M.Əkbərov bu mərhələdə rumın, M.Hüseynli isə italyan rəqibinə məğlub olub.
Komanda yarışında ən güclü 8-liyə yüksəlmək uğrunda keçirilən görüşdə İspaniyaya 41:45 hesabı ilə uduzan oğlan sablyaçılarımız 9-16-cı yerlər uğrunda keçirilən görüşdə Almaniya yığmasına 33:45 hesabı ilə məğlub olublar.
Bölmənin digər xəbərləri
