Salyanda uroloji əməliyyatların icrasına başlanılıb VİDEO
Salyan, 9 sentyabr, İsmayıl Cəfərli, AZƏRTAC
TƏBİB-in tabeliyində olan Salyan Rayon Mərkəzi Xəstəxanasında uzun illərdən sonra uroloji əməliyyatların icrasına başlanılıb.
AZƏRTAC xəbər verir ki, illərdir bu xidmətin olmaması səbəbindən rayon sakinləri paytaxta üz tutmaq məcburiyyətində qalırdılar. Artıq bu əməliyyatlar yerli xəstəxanada, peşəkar həkimlərin iştirakı və müasir tibbi avadanlıqların köməyi ilə həyata keçirilir.
Qısa müddət ərzində xəstəxanada 30-dan çox uroloji əməliyyat aparılıb. Cərrahi əməliyyatdan sonra müvafiq şöbədə müalicəsi davam etdirilən xəstələrin vəziyyəti qənaətbəxş qiymətləndirilərək, ambulator müalicə üçün evə buraxılıblar.
Cərrah-uroloq, androloq Əmrah Əliyev deyib: “Uzun aradan sonra mərkəzi xəstəxanada uroloji əməliyyatlara start verildi və ilk dəfə 8 yaşlı uşaq üzərində bioplastika əməliyyatını icra etdik. Təkcə Salyan rayonu yox, ətraf rayonlardan da bizə müraciət edənlər var. Əvvəllər rayon sakinləri belə əməliyyatlar üçün paytaxt xəstəxanalarına müraciət edirdilər, artıq buna ehtiyac yoxdur. Belə əməliyyatlar artıq öz rayonumuzda aparılır”.
Tibb müəssisəsinə müraciət edənlər arasında uzaq rayonlardan gələnlər də az deyil. Onlardan biri də Cəbrayıl rayon sakini Yaqub Ağayevdir. “Salyana Cəbrayıldan gəlmişəm. Həkimlər xəstəyə yaxşı baxırlar. Çox ağır vəziyyətdə gəlmişdim, indi sağ-salamatam, yaxşıyam”, - deyə o bildirib.
Salyan Rayon Mərkəzi Xəstəxanasında əhaliyə göstərilən xidmətlər elektron növbə sistemi əsasında həyata keçirilir. Tibb müəssisəsində qeydiyyat masalarının qarşısında yaranan sıxlığın aradan qaldırılması və pasiyentlərin növbə sistemini tənzimləmək məqsədilə elektron növbə monitorları quraşdırılıb. Həmçinin xəstəxanada yeni laborator analizatorlar quraşdırılıb, müasir tibbi avadanlıqlar, rəqəmsal rentgen cihazı, dializ xəstələri üçün yeni aparatlar gətirilib. Tezliklə xəstəxana maqnit-rezonans tomoqrafiya (MRT) və kompüter tomoqrafiyası (KT) avadanlıqları ilə təchiz olunacaq. Bundan başqa, burada Travmatologiya Mərkəzinin yaradılması üçün danışıqlara da başlanılıb.
Qeyd edək ki, Salyan Rayon Mərkəzi Xəstəxanası 1941-ci ildən fəaliyyət göstərir. Prezident İlham Əliyev və birinci xanım Mehriban Əliyeva 2023-cü il aprelin 18-də Salyan Rayon Mərkəzi Xəstəxanasının 80 çarpayılıq Doğum Evində və Uşaq Poliklinikasında əsaslı təmirdən sonra yaradılan şəraitlə tanış olublar. Müasir tələblərə cavab verən, tibbi avadanlıq və yeni inventarlarla təchiz edilən, 150 minə yaxın Salyan əhalisinə və ətraf rayonlara xidmət edən xəstəxana hazırda 260 çarpayılıqdır. Ümumilikdə, xəstəxanada 20 şöbə, 17 bölmə fəaliyyət göstərir.
Bir sözlə, müasir avadanlıqlar və peşəkar həkim heyəti sayəsində Salyan Rayon Mərkəzi Xəstəxanasında tibbi xidmətin səviyyəsi son bir ildə əhəmiyyətli dərəcədə yüksəlib. Bu da vətəndaşların sağlamlığı və məmnunluğu ilə nəticələnir.
Bölmənin digər xəbərləri
