“SARA XATUN” TAMAŞASININ PREMYERASI OLMUŞDUR
AZƏRTAC xəbər verir ki, iyulun 7-də Dövlət Gənclər Teatrında Nizami Saraclının “Sara Xatun” əsəri əsasında rejissor, əməkdar incəsənət xadimi Rəhman Əlizadənin quruluşunda eyni adlı tamaşanın premyerası olmuşdur.
Ağqoyunlu dövlətinin siyasi həyatında mühüm rol oynamış, Ağqoyunlu hökmdarı Uzun Həsənin anası, xalqımızın ilk diplomatik qadını Sara Xatunun obrazı Azərbaycan səhnəsində birinci dəfədir ki, canlandırılmışdır.
Dövlət Musiqili Komediya Teatrında keçən tamaşada Sara Xatunun həyatı və diplomatik fəaliyyətindən bəhs edilən məqamlarda onun ağqoyunluların dövlət müstəqilliyinin saxlanılmasında Osmanlı sultanı II Mehmetlə bağladığı Yassıçəmən müqaviləsinin əhəmiyyəti diqqətə daha qabarıq çatdırılır.
Tamaşada Sara Xatun obrazını respublikamızın əməkdar artisti Qəmər Məmmədova canlandırmışdır. Digər rollarda əməkdar artist Ayşad Məmmədova, aktyorlardan Ədalət Əbdülsəmədov, Rəşad Səfərov, Qədirhüseyn İsmayılov və başqaları çıxış etmişlər.
Yeni səhnə əsərinin rəssamı Vüqar Əlidir.
Bölmənin digər xəbərləri
