ŞƏHİDLƏRİMİZİN XATİRƏSİ XALQIMIZIN QAN YADDAŞINDAN SİLİNMƏYƏCƏKDİR
Bakı, 19 yanvar (AZƏRTAC). 20 Yanvar faciəsi Azərbaycan xalqının tarixinə mübarizlik, dönməzlik, qəhrəmanlıq salnaməsi kimi daxil olmuşdur. Həmin gün xalqımız hərbi, siyasi, mənəvi təcavüzə məruz qalsa da, özünün Vətənə sədaqətini, şücaətini, azadlıq, müstəqillik uğrunda mübarizliyini bütün dünyaya nümayiş etdirmişdir.
Bu fikirlər yanvarın 19-da Azərbaycan Dövlət Mədəniyyət və İncəsənət Universitetində 20 yanvar faciəsinin 20 illiyinə həsr olunmuş tədbirdə səslənmişdir.
Universitetin müəllimi, respublikanın əməkdar artisti Ağalar Bayramov faciənin başvermə səbəbləri, keçmiş sovet ordusunun dinc əhaliyə qarşı törətdiyi vəhşiliklər, insanlığa sığmayan cinayətləri barədə danışmışdır.
Qeyd olunmuşdur ki, müasir Azərbaycanın müstəqilliyi və azadlığı uğrunda həlak olmuş şəhidlərimizin nurlu xatirəsi heç zaman qədirbilən xalqımızın qan yaddaşından silinməyəcəkdir.
Universitetin rejissorluq fakültəsi tələbələrinin ifasında səhnə danışığı kafedrasının dosenti, əməkdar artist Mahirə Yaqubovanın ssenari müəllifi və rejissoru olduğu “Heç nə unudulmur ” ədəbi-bədii kompozisiya tədbir iştirakçıları tərəfindən böyük maraqla qarşılanmışdır.
Bölmənin digər xəbərləri
