SƏHİYYƏ NAZİRLİYİNDƏ KONFRANS KEÇİRİLMİŞDİR
Səhiyyə Nazirliyinin mətbuat xidmətindən AZƏRTAC-a bildirmişlər ki, nazirliyin, ABŞ-ın Beynəlxalq İnkişaf Agentliyinin (USAID) və “ACQUİRE Azərbaycan” Reproduktiv Sağlamlıq və Ailə Planlaşdırılması layihəsinin təşkilatçılığı ilə keçirilən tədbir müasir kontraseptiv üsullar və onların Azərbaycan ailələrinin planlaşdırılmasında rolunun daha da artırılması məsələlərinə həsr olunmuşdu. Konfransda rayonların baş ginekoloqları, reproduktiv sağlamlıq mərkəzlərinin əməkdaşları, müvafiq beynəlxalq təşkilatların təmsilçiləri iştirak etmişlər.
Konfransı nazir Əli İnsanov açaraq bildirmişdir ki, ABŞ hökuməti səhiyyəmizin inkişafına indiyədək 40 milyon dollara yaxın qrant ayırmışdır. Sentyabrın 28-də isə Qlobal Fond Azərbaycanda vərəmə qarşı mübarizə tədbirləri üçün 9 milyon dollarlıq qrant layihəsini təsdiqləmişdir. Nazir həmçinin demişdir ki, USAID ölkəmizdə həyata keçirilən reproduktiv sağlamlıqla bağlı layihəyə 7 milyon dollarlıq qrant ayırmışdır. Bu vəsait bölgələrdə ailə planlaşdırma mərkəzlərinin yaradılmasına sərf olunacaqdır. Hazırda 30 rayonda belə mərkəz fəaliyyət göstərir.
“ACQUİRE Azərbaycan” layihəsinin rəhbəri Marianna Nosa, nazirliyin reproduktiv sağlamlıq üzrə milli əlaqələndiricisi İzzət Şamxalova, mütəxəssislər Ləvənt Çağatay, Kelli O Hanley bu sahədə qazanılmış nailiyyət və təcrübədən, yeni kontraseptiv texnologiyaların tətbiq olunması ilə bağlı görülmüş işlərdən danışmışlar.
Bölmənin digər xəbərləri
