ŞƏKİDƏ “ŞAHİN” HƏRBİ-İDMAN OYUNUNUN ZONA TURU KEÇİRİLMİŞDİR
AZƏRTAC-ın müxbiri xəbər verir ki, aprelin 4-də Şəki şəhərində yerləşən “N” saylı hərbi hissədə “Şahin” hərbi-idman oyununun zona turunun yarışları keçirilmişdir. Yarışlarda Balakən, Zaqatala, Qax, Oğuz, Qəbələ və Zərdab rayonlarının komandaları iştirak etmişlər. Ev sahibi Şəki komandası isə Tərtərdə keçirilən zona yarışlarına qatılacaqdır.
Gənclər və İdman, Təhsil, Müdafiə nazirliklərinin birgə təşkilatçılığı ilə keçirilən bu yarışlar yeniyetmə və gənclərin hərbi-vətənpərvərlik, Vətənə məhəbbət ruhunda tərbiyə olunması, habelə hərbi xidmətə hazırlanması məqsədi daşıyır.
Komandalar sıra hazırlığı, silahın sökülüb yığılması, hədəfə atəşaçma, maneənin dəf olunması, sanitarların hazırlığı və digər yarışlarda öz qüvvələrini sınamışlar.
Zona turunu birinci və ikinci pillədə başa vuran Qax və Zərdab rayonlarının komandaları “Şahin” hərbi-idman oyununun mayda Bakı şəhərində keçiriləcək final mərhələsinə vəsiqə qazanmışlar. Balakən komandası isə yarışları üçüncü pillədə başa vurmuşdur.
Zona turunun qaliblərinə Gənclər və İdman Nazirliyinin diplomları təqdim olunmuşdur.
Bölmənin digər xəbərləri
