Şəkidə xovlu tikmə sənəti ilə məşğul olan yeganə kişi sənətkar - FOTO
Şəki, 2 fevral, Mustafa Dadaşov, AZƏRTAC
Şəkidə hamı onu xovlu tikmə sənəti ilə məşğul olan yeganə kişi sənətkar kimi tanıyır. Taleyinə anadangəlmə əlillik payı düşən ikinci qrup əlil Rəhman Kamiloğlu 20 ildən çoxdur ki, bədii tikmə sənətinin bu növü ilə məşğul olur. Bədii tikmə sənəti əsrlərboyu qadınların sevimli məşğuliyyət sahəsi olsa da, bu sənət xırda əmtəə istehsalı səviyyəsinə yüksələndən sonra onunla kişilər də məşğul olmağa başlayıb.
Rəhmanın uşaqlığı çox çətin və qayğılı keçib, erkən yaşlarında valideynlərini itirib. O, uşaqlıqdan dolanışığını təmin etməyi, heç kəsdən kömək ummamağı qarşısına məqsəd qoyub. Şəkinin tanınmış sənətkarlarından rəssamlığın, bədii tikmə sənətinin sirlərini öyrənərək qısa müddətdə xovlu tikmənin mahir ustalarından biri kimi tanınıb.
AZƏRTAC-ın bölgə müxbiri xəbər verir ki, anadangəlmə nitq problemi olan Rəhman Kamiloğlu əl işlərində sanki ürək sözlərini, duyğularını, deyə bilmədiklərini əks etdirməyə çalışır. Doğulduğu diyarın təbiət mənzərələri, qədim yaşayış məhəllələri, tarixi binalar, daş döşənmiş küçələr, qırmızı kirəmitli evlər, eyvanlar, həmçinin Şəki xanlarının sarayı, Yuxarı və Aşağı karvansaraylar, məscidlər, minarələr, körpülər və digər qədim tarixi abidələr Rəhmanın əsərlərinin əsas mövzusunu təşkil edir.
Rəhman Kamiloğlu öz yaradıcılığında daim yeniliklər etməyə, yeni mövzular axtarıb tapmağa can atır. Sənətkar Azərbaycanın muğam sənətini, milli musiqi alətlərimizi rəngbərəng saplarla kətan üzərində toxumaqla maraqlı kompozisiyalar yaratmağa müvəffəq olub. Son illər mədəni irsimizin, muğam sənətinin qorunması və təbliğinə ölkə rəhbərliyi, xüsusilə də Azərbaycan Respublikasının Birinci vitse-prezidenti Mehriban xanım Əliyeva tərəfindən böyük diqqət və qayğı göstərildiyini vurğulayan sənətkar deyir: “Mən də, bir sənətkar kimi, bu layihələrə öz töhfəmi vermək istədim. Şəhərimizə gələn yerli və xarici turistlər milli musiqi alətlərimizin əks olunduğu xovlu tikmələrə böyük maraq göstərirlər. Ona görə də yaradıcılığımda Şəkinin məşhur tarixi abidələri, təbiət gözəllikləri ilə yanaşı, muğam kompozisiyalarına da yer ayırmağa başladım. Turistlər belə əl işlərini böyük həvəslə alırlar”.
Torpaqlarımızın erməni işğalından azad edilməsi uğrunda başlanan 44 günlük Vətən müharibəsində Müzəffər Ali Baş Komandan İlham Əliyevin rəhbərliyi ilə Azərbaycan Ordusunun düşmən üzərindəki şanlı Qələbəsindən ruhlanan Rəhman doğma Qarabağımızın təbiət gözəlliklərini, möhtəşəm tarixi abidələrini rəngbərəng saplarla kətan üzərində toxumaqla maraqlı kompozisiyalar yaradıb. Qarabağ mövzusuna aid bir neçə əsəri Rəssamlar İttifaqı tərəfindən təşkil olunan “Zəfər yürüşü” adlı respublika sərgisində də nümayiş olunub.
Rəhman Kamiloğlunun əl işləri dəfələrlə respublika və beynəlxalq səviyyəli sərgilərdə nümayiş etdirilib, diplomlara layiq görülüb. Sənətkar 2021-ci ilin dekabrında Əmək və Əhalinin Sosial Müdafiəsi Nazirliyi və Sosial Xidmətlər Agentliyinin birgə təşkilatçılığı ilə keçirilmiş Əlilliyi olan şəxslərin XI Ümumrespublika yaradıcılıq sərgi-müsabiqəsində bədii tikmə nominasiyası üzrə 1-ci yerə layiq görülüb, diplomla mükafatlandırılıb.
Fevralın 2-də Şəki Dövlət Rəsm Qalereyasında təkəlduz ustası Rəhman Kamiloğlunun ilk fərdi sərgisi açılıb. Mərasimdə Şəkinin tanınmış sənətkarları, sənətsevərlər, gənclər iştirak ediblər.
Çıxış edənlər sənətkarın həyat və yaradıcılığından söz açıb, ona gələcək fəaliyyətində yeni-yeni yaradıcılıq uğurları arzulayıblar.
Hazırda Rəhman Kamiloğlu sevdiyi sənətdən bir an belə olsa ayrılmır, yaradıcılığını inkişaf etdirmək üçün daim çalışır, axtarır, yeniliklərə can atır.
Bölmənin digər xəbərləri
