SEMİNAR-TƏLİM MƏŞĞƏLƏLƏRİ BAŞA ÇATMIŞDIR
AZƏRTAC xəbər verir ki, Dünya Gömrük Təşkilatının Bakıdakı Regional Tədris Mərkəzində Avropa İttifaqının maliyyələşdirdiyi və BMT-nin İnkişaf Proqramının icra etdiyi “Cənubi Qafqazda Narkotiklərə Nəzarət” Regional Yardım Proqramının (SCAD) IV mərhələsi çərçivəsində Gürcüstan və Azərbaycanın beynəlxalq dəniz limanlarının 20 əməkdaşı üçün keçirilən seminar-təlim məşğələləri başa çatmışdır.
Seminarda BMT-nin regionda narkotik vəziyyətlə bağlı 2006-cı il üçün hesabatı, narkotiklərin müəyyənləşdirilməsi, nəqliyyat vasitələri üzrə riskin qiymətləndirilməsi, informasiya mənbələrinin tədqiqi, konteynerlərin yoxlanması, gəmilərdə axtarış və sair məsələlər müzakirə olunmuşdur.
Sonda iştirakçılara xüsusi sertifikatlar verilmişdir.
