Şəmkirdə yaşayış yerini tərk edən koronavirus xəstələri məsuliyyətə cəlb olunub
Bakı, 11 dekabr, AZƏRTAC
Şəmkir Rayon Polis Şöbəsinin əməkdaşları koronavirus testinin nəticəsi pozitiv çıxan rayon sakinləri Xanım Aslanlı, Bulqeys İbrahimova, Asiman Süleymanov və Seymur Əmiraslanovun ev şəraitində müalicə almalı olduqlarına baxmayaraq, karantin qaydalarını kobud şəkildə pozaraq, yaşadığı ünvanları tərk etdiklərini müəyyənləşdirilib.
Daxili İşlər Nazirliyinin mətbuat xidmətinin Gəncə regional qrupundan AZƏRTAC-a bildiriblər ki, polis əməkdaşları onların rayon ərazisində yerini dərhal müəyyənləşdirərək müvafiq tibbi prosedurlar gözlənilməklə yaşadıqları evə göndəriblər.
Həmin şəxslər barədə rayon polis şöbəsinin istintaq bölməsində Azərbaycan Respublikasının Cinayət Məcəlləsinin 139-1-ci (Epidemiya əleyhinə rejimin, sanitariya-gigiyena və ya karantin rejimlərinin pozulması) maddəsi ilə cinayət işi başlanıb.
Faktla bağlı araşdırmalar davam etdirilir.
Bölmənin digər xəbərləri
