SESSİYANIN İKİNCİ İŞ GÜNÜNDƏ QLOBAL MƏSƏLƏLƏR MÜZAKİRƏ EDİLMİŞDİR
Sessiyanın gündəliyinə uyğun olaraq, günün birinci yarısında “Avropa Şurasına üzv olan ölkələrdə gizli həbsxanaların araşdırılması” və “Su hövzələrinin yaxşılaşdırılması” məsələləri müzakirə edilmişdir.
Birinci məsələ ilə bağlı məruzə və çıxışlarda Avropa Şurasının gizli həbsxanaların mövcudluğundan və bu həbsxanalarda cəza çəkən insanların hüquqlarının pozulmasından, Kuba ərazisindəki Quantanamo düşərgəsində məhbusların ağır şəraitindən ciddi narahatlıq keçirdiyi vurğulanmış, belə həbsxanaların Avropa ölkələrində olmasının araşdırılmasının zəruriliyi qeyd edilmişdir.
Su ehtiyatlarının azalmasını, 1,5 milyard insanın qismən, 2,3 milyard adamın isə tamamilə içməli suya ehtiyac duyduğunu diqqətə çatdıran deputatlar Avropa Şurasından bu məsələyə ciddi münasibət göstərməyi tələb etmişlər.
Günün ikinci yarısında iclas Bolqarıstanın Baş naziri Sergey Staniçevin çıxışı ilə başlanmışdır. Ölkəsinin tezliklə Avropa İttifaqına üzv olacağını vurğulayan Baş nazir keçid dövrünü yaşayan Bolqarıstanın bəzi çətinliklərə baxmayaraq, demokratik inkişaf yolu tutduğunu, məhkəmə sisteminin yenidən qurulduğunu, islahatlar aparıldığını, etnik azlıqlara qayğı göstərildiyini qeyd etmiş, deputatların suallarına cavab vermişdir.
Sessiyada Gürcüstanın təşkilat qarşısında götürdüyü öhdəliklərin yerinə yetirilməsi vəziyyəti ilə bağlı məruzə dinlənilmişdir. İstər məruzədə, istərsə də çıxışlarda son dövrlər ölkədə mühüm dəyişikliklər baş verdiyi, müəyyən islahatlar aparıldığı qeyd olunmuşdur. Bununla yanaşı, korrupsiyaya qarşı mübarizənin istənilən səviyyədə olmaması, yerli orqanlara seçkilərin Avropa Şurasının tələblərinə uyğun aparılması üçün çox işlər görülməsinin vacibliyi göstərilmişdir.
Sessiyanın iş gününün sonunda Avropada mühacir qadınların vəziyyəti məsələsi müzakirə olunmuşdur. Bu məsələ ətrafında azərbaycanlı deputat Elmira Axundova çıxış etmişdir. Mühacir qadınların ağır vəziyyətdə yaşamasının dünya ictimaiyyətini narahat edən problemlərdən olduğunu qeyd edən E.Axundova, bu məsələnin azərbaycanlı qadınlardan da yan keçmədiyini bildirmişdir. Ermənistanın hərbi təcavüzü nəticəsində öz doğma yurdlarından didərgin düşmüş 1 milyondan artıq qaçqın və məcburi köçkün arasında çoxlu qadın olduğunu diqətə çatdıran deputat, beynəlxalq təşkilatların bu günə qədər onların hüquqlarının pozulmasına göz yumduğunu xatırlatmışdır.
E.Axundova müəyyən səbəblərdən xarici ölkələrə immiqrasiya etmiş azərbaycanlı qadınların ağır şəraitdə yaşadığını, heç bir statusa malik olmadıqlarını, ali təhsilli qadınların onlara layiq olmayan işlərdə çalışdıqlarını bildirmiş, mühacir qadınların yaşadıqları ölkələrdəki qadınlarla eyni hüquqlara malik olmalarının vacibliyini göstərmişdir.
Azərbaycanlı deputatın çıxışı maraqla qarşılanmışdır.
Bölmənin digər xəbərləri
