Şirkət faizsiz borcu təsisçiyə qaytararkən vergi öhdəliyi yaranırmı?
Bakı, 21 fevral, AZƏRTAC
Təsisçi şirkətə faizsiz borc müqaviləsinə əsasən müəyyən vəsait verib. Şirkət tərəfindən həmin vəsait geri qaytarılan zaman onun üçün hər hansı vergi öhdəliyi və hesabat təqdim etmək öhdəliyi yaranırmı?
AZƏRTAC Dövlət Vergi Xidmətinə istinadla xəbər verir ki, vergi qanunvericiliyinə əsasən, təsərrüfat əqdləri qarşılıqlı surətdə asılı olan şəxslər arasında həyata keçirildikdə vergilərin hesablanması bazar qiyməti nəzərə alınmaqla həyata keçirilir.
Hüquqi şəxslə onun təsisçisi isə mülki hüququn ayrı-ayrı subyektləri olmaqla vergitutma məqsədləri üçün qarşılıqlı surətdə asılı olan şəxslər sayılır.
Qeyd olunub ki, qanunvericiliyin müddəaları əsas götürülməklə təsisçi tərəfindən müəssisəyə faizsiz verilmiş borc məbləğinə vergitutma məqsədləri üçün həmin borcun aid olduğu dövrdə eyni valyuta ilə oxşar müddətə verilmiş kreditlər üzrə faizlərin səviyyəsi nəzərə alınmaqla faizlər hesablanmalıdır. Vergi Məcəlləsinin 123.1-ci maddəsinə uyğun olaraq ödəmə mənbəyində 10 faiz dərəcə ilə vergi tutulub dövlət büdcəsinə ödənilməli və rüb başa çatdıqdan sonra növbəti ayın 20-dən gec olmayaraq vergi orqanına bəyannamə təqdim edilməlidir.
Bölmənin digər xəbərləri
