Sloveniyada ahıllar evində Azərbaycana dair təqdimat keçirilib
Vyana, 22 yanvar, AZƏRTAC
Sloveniyanın Litiya şəhərindəki ahıllar evində Azərbaycan-Türk Mədəniyyət Assosiasiyasının təşkilatçılığı ilə Azərbaycanın tanıtımına həsr olunmuş tədbir keçirilib.
AZƏRTAC xəbər verir ki, Assosiasiyanın vitse-prezidenti Jalə Qurbanova tədbirin məzmun və mahiyyətindən danışıb.
Assosiasiyanın prezidenti Taleh Qurbanov isə ölkəmiz haqqında geniş və dolğun məlumat təqdim edib. O, təqdimatda iki ölkə arasındakı iqtisadi və diplomatik əlaqələrin əhəmiyyətini də xüsusi vurğulayıb.
Bildirilib ki, Azərbaycan hər zaman sülhü, əməkdaşlığı və sabitliyi öz xarici siyasətinin əsas prioritetlərindən biri kimi görür. Ölkəmiz bu yanaşmanı yalnız öz milli maraqları üçün deyil, həm də bütün bölgənin rifahı və təhlükəsizliyi üçün vacib hesab edir.
Tədbirdə Azərbaycan mədəniyyətinin zənginliyini əks etdirən bədii proqram da təqdim olunub. Assosiasiyanın üzvləri Barış Öncebe və Baransel Oğuz Azərbaycan və türk musiqilərindən ibarət ifaları ilə qonaqlara unudulmaz anlar yaşadıblar.
Tədbirin qonaqlarından biri - Sloveniyada tanınmış iş qadını Mariya Çop Azərbaycan haqqında səmimi fikirlərini bölüşərək, ölkəmizin zəngin tarix və mədəniyyətinə olan heyranlığını ifadə edib.
Sonra Azərbaycan haqqında qısametrajlı video nümayiş etdirilib, eyni zamanda, iştirakçılara sloven dilində hazırlanmış broşürlər təqdim olunub.
Sloveniyalı musiqiçinin canlı ifası da tədbirə rəng qatıb və böyük maraqla qarşılanıb.
Sonda ahıllar evinin rəhbərliyinə Azərbaycanın milli baş örtüyü olan kəlağayı hədiyyə olunub. Milli atributlardan biri hesab edilən bu tətbiqi sənət nümunəsinin hədiyyə edilməsi eyni zamanda Azərbaycanın zəngin mədəniyyətinin və qonaqpərvərliyinin simvolu kimi dərin təsir bağışlayıb.
Elgün Niftəli
Bölmənin digər xəbərləri
