SOFİ LOREN 70 İLLİYİNİ QEYD EDİR

20.09.2004 [13:59]
Çap et
A⁺ A^-

AZƏRTAC xəbər verir ki, dünya şöhrətli italyan aktrisası Sofi Lorenin sentyabrın 20-də 70 yaşı tamam olur. Çoxsaylı sorğuların yekunlarına görə, XX əsrin ən gözəl qadını hesab edilmiş italyan xanımı indi də əvvəlkitək təravətli görünür.

Sofi Loren kinoda ilk rolunu 1952-ci ildə oynamışdır. Onu kinoda çəkilməyə sonralar ərə getdiyi prodüser Karlo Ponti dəvət etmişdi. 1954-cü ildə o, Vittorio De Sikanın “Neapolun qızılı” filmində çəkilərək, dünya şöhrəti qazanmışdır. 1957-ci ildə aktrisa Birləşmiş Ştatlara gedərək, Hollivudda “Qarağac altında məhəbbət” və “Qara səhləb” filmlərində çəkilir. Həmin il ilin ən yaxşı aktrisası kimi Venesiya festivalının mükafatına layiq görülür.

Vittorio De Sikanın “”Çoçara” filmində oynadığı ən yaxşı qadın roluna görə 1960-ci ildə “Oskar” mükafatını və Kann festivalının mükafatını alır. 1964-cü ildə “İtalyansayağı nikah” filmində Filumena roluna görə Moskva kinofestivalının mükafatı ilə təltif edilir. 1965-ci ildə Marçello Mastroyanni ilə birlikdə “Günəbaxanlar” sovet-İtaliya filmində müharibədən sonra SSRİ-də qalan ərini axtarmağa gələn italyan qadını rolunu oynayır.

Sofi Loren kinematoqrafa töhfəsinə görə 1991-ci ildə ikinci dəfə “Oskar” mükafatı alır. 1994-cü ildə onun yaradıcılığı Berlin kinofestivalının fəxri baş mükafatı ilə qeyd olunur.

Onun çəkildiyi digər filmlər bu gün də dünya ekranlarında və teleekranlarda böyük uğurla nümayiş etdirilir.