“ŞÖHRƏT” MUZEYİ ULU ÖNDƏRİN TARİXİ XİDMƏTLƏRİNİ YAŞADIR
Azərbaycan Prezidenti İlham Əliyev muzeyin rəmzi açılışını bildirən lenti kəsdi.
Dövlətimizin başçısına məlumat verildi ki, ulu öndərə həsr olunmuş muzeyin zövqlə və müasir dizaynla tərtib edilmiş stendlərində 1998-ci il dekabrın 1-də Heydər Əliyevin Akademiyanın yaradılması haqqında imzaladığı Sərəncam, Akademiyaya Heydər Əliyevin adının verilməsi barədə Prezident İlham Əliyevin 2005-ci il 20 dekabr tarixli Fərmanı, müxtəlif fotoşəkillər, materiallar, ilk dəfə təqdim olunan arxiv sənədləri nümayiş etdirilir.
Burada ulu öndərin ömrünün 25 ilini həsr etdiyi xüsusi xidmət orqanlarındakı fəaliyyətinə dair guşə böyük maraq doğurur. Eyni zamanda, onun uşaqlıq, gənclik illərini, respublikaya rəhbərliyinin hər iki dövrünü əhatə edən fotoşəkillər, sənədlər və materiallarla da tanış olmaq mümkündür.
Muzeydə Heydər Əliyevin Dövlət Təhlükəsizliyi Komitəsində işlədiyi dövrə aid hərbi geyimi, kabinetində olan əşyalar, ona verilmiş hədiyyələr, mükafatlar, ümumiyyətlə, ulu öndərlə bağlı minə yaxın eksponat toplanmışdır. Bundan sonra da yeni sənədlərlə zənginləşəcək muzeydə ulu öndərimizin həyat və fəaliyyətini əks etdirən salon, rəsmi mərasimlərin keçirilməsi üçün nəzərdə tutulmuş konfrans salonu, arxiv, fond fəaliyyət göstərir. Muzeydə xalqımızın ümummilli liderinin büstü də qoyulmuşdur.
Prezident İlham Əliyev muzeylə yaxından tanış oldu, ayrı-ayrı fotoşəkillərə, arxiv sənədlərinə, ümummilli liderimizin təltif olunduğu orden və medallara, əbədiyaşar Prezidentin iş otağının eksponatlarına maraqla baxdı.
Muzeylə tanışlıqdan sonra dövlətimizin başçısı fəxri qonaqlar kitabına ürək sözlərini yazdı:
“Heydər Əliyev muzeyinin eksponatları ulu öndərin həyat və fəaliyyətini çox dolğun şəkildə əks etdirir. Gənc yaşlarından öz taleyini təhlükəsizlik orqanları ilə bağlayan Heydər Əliyev ən yüksək zirvələri fəth etmişdir. Dünya şöhrətli siyasətçi, görkəmli dövlət xadimi bütün dünyada böyük hörmət qazanmışdır.
Müstəqil Azərbaycanın Prezidenti kimi ölkəmiz üçün həlledici, taleyüklü anlarda həmişə cəsarət, müdriklik, vətənpərvərlik nümayiş etdirmişdir. Onun həyat və fəaliyyəti hamımız üçün örnəkdir. Müstəqil Azərbaycan Heydər Əliyevin şah əsəridir. Eyni zamanda, təhlükəsizlik orqanlarında işlədiyi dövr bizim üçün həmişə çox əziz idi. Ən kiçik vəzifədən Dövlət Təhlükəsizliyi Komitəsinin sədri vəzifəsinə yüksəlmiş, general rütbəsi almış ulu öndər Azərbaycanda təhlükəsizlik orqanlarının formalaşmasında və möhkəmlənməsində müstəsna rol oynamışdır.
Bu gözəl muzeyi yaradanlara öz təşəkkürümü bildirirəm. Milli Təhlükəsizlik Nazirliyinin bütün əməkdaşlarına dövlət maraqlarmızın qorunmasında yeni uğurlar arzulayıram.
İlham Əliyev
Azərbaycan Respublikasının Prezidenti
Bakı şəhəri, 27 mart 2006-cı il”.
X X X
Azərbaycan Prezidenti İlham Əliyev daha sonra Akademiyanın yeməkxanası, tədris korpusu, sinif otaqlarını gəzdi. Kriminalistika kabinetində məlumat verildi ki, kursantların bugünkü dərsinin mövzusu sənədlərdə və pullarda saxtakarlıq əlamətlərinin müəyyənləşdirilməsidir. Bunun üçün xüsusi təyinatlı cihazlardan istifadə olunur.
Prezident İlham Əliyev kabinetdəki müxtəlif stendlərə, saxta sənədlərin nümunələrinə, kriminalistika üzrə beynəlxalq tədris materiallarına, terrorçulardan və sərhədlərimizi qanunsuz keçən şəxslərdən götürülmüş saxta sənədlərə baxdı və lazım olan texniki avadanlığın alınmasının zəruriliyini bildirdi.
Dövlətimizin başçısı Akademiyanın müasir standartlara cavab verən klubu ilə də tanış oldu. Akademiyanın rəisi Ziya Yusifzadə bu ali təhsil ocağının maketi əsasında gələcəkdə nəzərdə tutulan tikinti işləri barədə məlumat verdi.
X X X
Sonra Akademiyaya Döyüş bayrağının təqdim olunması mərasimi keçirildi. Bildirildi ki, Azərbaycan Respublikası Prezidentinin 2006-cı il 24 mart tarixli Fərmanı ilə Milli Təhlükəsizlik Nazirliyinin Heydər Əliyev adına Akademiyasının Döyüş bayrağı haqqında Əsasnaməsi və Döyüş bayrağının təsviri təsdiq olunmuşdur.
Azərbaycan Prezidenti, Ali baş komandan İlham Əliyev kursantları salamladı.
Ali baş komandan Döyüş bayrağını Milli Təhlükəsizlik Nazirliyinin Heydər Əliyev adına Akademiyasının rəisinə təqdim etdi.
Akademiyanın rəisi Ziya Yusifzadə Döyüş bayrağını qəbul edərək dedi:
- Cənab Prezident, Ali baş komandan, Milli Təhlükəsizlik Nazirliyinin Heydər Əliyev adına Akademiyasına verilən bu bayrağı göz bəbəyi kimi qorumağa, Vətənimizə, xalqımıza, onun sevimli oğlu cənab İlham Əliyevə ləyaqətlə xidmət etməyə and içirik.
Azərbaycanın dövlət himni əzəmətlə səsləndi.
Milli təhlükəsizlik naziri general-leytenant Eldar Mahmudov mərasimdə çıxış etdi.
Bölmənin digər xəbərləri
