Sosial-İqtisadi Kollecdə 8 Noyabr - Zəfər Gününün beşinci ildönümü qeyd edilib
Bakı, 6 noyabr, AZƏRTAC
Azərbaycan Dövlət İqtisad Universitetinin (UNEC) nəzdində Sosial-İqtisadi Kollecdə 8 Noyabr - Zəfər Gününün beşinci ildönümünə həsr olunmuş “Zəfərin mübarək, Azərbaycan!” adlı tədbir keçirilib.
Bu barədə AZƏRTAC-a kollecdən məlumat verilib.
Azərbaycan Respublikasının Dövlət Himninin səsləndirilməsi ilə başlayan tədbirdə ölkəmizin ərazi bütövlüyü uğrunda şəhidlik zirvəsinə ucalan qəhrəman oğulların xatirəsi bir dəqiqəlik sükutla yad edilib.
Sosial-İqtisadi Kollecin direktoru Mübariz Hacıbəyov 8 Noyabr - Zəfər Gününün beşinci ildönümünün qeyd edilməsindən qürur duyduqlarını söyləyib, hərbçilərimizin cəsarətindən, qəhrəmanlığından və Prezident, Ali Baş Komandan İlham Əliyevin 44 günlük Vətən müharibəsi zamanı qətiyyətindən söz açıb.
Tədbirdə Vətən müharibəsi şəhidi Ataməli Musaoğlunun anası Leyla Musayeva çıxış edərək deyib: “Biz tariximizi heç vaxt unutmamalıyıq. Ali Baş Komandanın rəhbərliyi ilə xalqımız bir yumruq kimi birləşdi. Düzdür itkilərimiz, ağrılarımız, acılarımız çox olsa da, qəlbimizdə bir qürur və fəxarət duyğusu baş qaldırır. Poladlarımızın, Mübarizlərimizin,Cəbrayıllarımızın, Ataməlinin qisası alındı. O salnaməni isə Azərbaycan Ordusu yazdı”.
Elm və Təhsil İşçiləri Həmkarlar İttifaqı Sabunçu Rayon Komitəsinin sədri Alı Məmmədov çıxışında şəhidlərimizin, qazilərimizin Azərbaycan tarixinə şanlı səhifələr yazdıqlarını söyləyib.
Bakı Şəhər Gənclər və İdman İdarəsinin Sabunçu rayonu üzrə sektor müdiri Rakif Əliyev, Bakı Gənclər Mərkəzinin nümayəndəsi Kənan Şərifov, Sabunçu Gənclər Evinin direktoru Kamil Yaqubov, “Azərbaycan Qarabağ Müharibəsi Əlilləri, Veteranları və Şəhid Ailələri” İctimai Birliyi Sabunçu rayon filialının sədri Çingiz Tağıyev çıxış edərək Vətən müharibəsində Azərbaycan xalqının öz liderinin - Müzəffər Ali Baş Komandan İlham Əliyevin ətrafında sıx birləşərək bütün dünyaya öz gücünü, mətinliyini, mübarizliyini nümayiş etdirdiyini vurğulayıblar.
Sonra tədbir iştirakçılarına təşəkkürnamə təqdim olunub.
Tədbir kollec tələbələrinin hazırladığı bədii hissə ilə davam edib.
Bölmənin digər xəbərləri
