ŞOTLANDİYA ZURNASININ SƏDALARI ALTINDA GİMNASTİKA

27.11.2006 [17:53]
Çap et
A⁺ A^-

Qala-konsert artıq çoxdandır ən iri və mötəbər gimnastika yarışlarının ayrılmaz hissəsinə çevrilmişdir. Lakin gimnastların dəvətli ziyafətin ulduzuna çevrilmələri, sözün əsil mənasında, Azərbaycanda ilk dəfədir baş verir.

AZƏRTAC xəbər verir ki, “Gülüstan” sarayında Şotlandiyanın hamisi Müqəddəs Endryu günü münasibətilə tədbir keçirilmişdir. Şotlandiyanın bayrağı və gerbi ilə bəzədilmiş salonda milli geyimli kişilər tuluq zurnasının sədaları altında ziyafəti açmışlar. Gecənin aparıcıları gimnastların çıxışını elan etmişlər.

Gənc Bakı gimnastları və akrobatları milli və müasir Şotlandiya motivləri, habelə klassik musiqi və Azərbaycan musiqisinin sədaları altında 9 müxtəlif nömrə nümayiş etdirmişlər.

Qala-konsert heç kimi laqeyd qoymamışdır. Qonaqlar idmançıları ayaq üstə sürəkli alqışlarla qarşılamışlar.

Zurnaçalan Devid MakDonald demişdir: “Gimnastlarınızın çıxışı çox xoşuma gəldi. Mən özüm daha çox futbol pərəstişkarıyam, həmişə stadiona gedir və “Qlazqo reyncers”in oyununa baxıram. Reqbiyə, yəni idmanın komanda-güc növlərinə baxmağı da sevirəm. Söz verirəm ki, bundan sonra gimnastikanı da izləyəcəyəm və yaxşı olardı ki, belə tamaşalar tez-tez göstərilsin”.

Gecənin aparıcıları da bayramda iştiraka görə Azərbaycan Gimnastika Federasiyasına minnətdarlıqlarını bildirmişlər.

Konsertin rejissoru Alla Vlasova demişdir ki, belə şənliklərin bundan sonra da keçiriləcəyi istisna deyildir.