Şövqi Hüseynov: “Killerdən teleqram” vasitəsilə cəmiyyətə sevginin dünyanı xilas edəcəyi mesajını ötürürük
Bakı, 10 oktyabr, AZƏRTAC
“Kütləvi tamaşalardan fərqli olaraq monotamaşalarda əlavə heç bir kömək və tərəf müqabili olmur. Yalnız sən və səhnən”.
Bunu AZƏRTAC-a müsahibəsində “Killerdən teleqram” adlı monotamaşanın aktyoru, Əməkdar artist Şövqi Hüseynov deyib.
Tamaşaya hazırlıq prosesindən söhbət açan Əməkdar artist vurğulayıb ki, bu səhnə əsəri üzərində bir ilə yaxındır məşq prosesi gedir. “Biz məşqlərdə yeniliklər əlavə edir, dəyişirdik. Mənim üçün səhnəyə çıxmaq çox çətin prosesdir. Hər dəfə yeni rol təklif olunanda eyni fikirə düşürəm. Daha aydın desəm, özümü qaranlıq meşədə hiss edir, dünyanın tamamilə qaranlıq olduğuna inandırıram. Nəticədə isə işığı tapmaq yolunda durmadan çalışıram”,- deyə o əlavə edib.
Ş.Hüseynov obrazı haqqında məlumat verərkən qeyd edib: “Killer - Cəlil kiçik yaşlarından bəri təhqirə məruz qalan fərddir. O, ilk dəfə 14 yaşında biixtiyar qətl törədir və ömrünün sonuna kimi bu yoldan əl çəkə bilmir. Finalda əsas qəhrəman qaranlıq zirzəmidə öz sevgisi uğrunda canını fəda edir”.
Aktyor 1994-cü ildən monotamaşalarda obrazlar canlandırdığını qeyd edib. “Bu mənim sayca altıncı monotamaşamdır. Hazırda hər biri teatrların repertuarında yer alır. Monotamaşalarda əsas yük sadəcə bir aktyorun üzərinə düşür. Ümumiyyətlə aktyor sənəti çox məşəqqətli, eyni zamanda şərəfli peşədir”, - deyə o bildirib.
Bölmənin digər xəbərləri
