STOLÜSTÜ TENNİS ÜZRƏ “TOP-12” TURNİRİNİN QALİBLƏRİ MƏLUM OLMUŞDUR
AZƏRTAC xəbər verir ki, Bakı Olimpiya İdman Kompleksində gənclər arasında stolüstü tennis üzrə “Top-12” turniri keçirilmişdir.
Yarışda oğlanlar arasında 13, qızlar arasında isə 11 idmançı mübarizə aparmışdır. İki gün davam etmiş turnirin nəticələrinə əsasən, Fərhad İsmayılov (“Neftçi”) oğlanların yarışında birinci yeri tutmuşdur. Anar Məmmədov (“Xəzri”) ikinci, Ramil Cəfərov (“Təhsil”) isə üçüncü yerə layiq görülmüşlər.
Qızlar arasında isə Sumqayıt Uşaq-Gənclər, İdman Məktəbinin yetirməsi Billurə Eminova (Sumqayıt) fəxri kürsünün ən yüksək pilləsinə qalxmışdır. Növbəti iki yerə isə Sevinc Abbasova (“Aztelekom”) və Xəyalə Qiyasova (“Aztelekom”) sahib olmuşlar.
Fərqlənmiş idmançılara Stolüstü Tennis Federasiyasının pul mükafatları və diplomları təqdim olunmuşdur.
Bölmənin digər xəbərləri
