ŞUŞALILAR 20 YANVAR ŞƏHİDLƏRİNİN XATİRƏSİNİ ANMIŞLAR
Bakı, 19 yanvar (AZƏRTAC). Yanvarın 19-da Şuşa Rayon İcra Hakimiyyəti 20 Yanvar faciəsinin 20-ci ildönümü ilə bağlı Rəşid Behbudov adına Azərbaycan Dövlət Mahnı Teatrında “Yanvarın 20-ci günü” adlı anma tədbiri keçirmişdir.
Şəhidlərin xatirəsi bir dəqiqəlik sükutla yad edildikdən sonra Şuşa Rayon İcra Hakimiyyəti başçısının müavini Elxan Ələkbərov Bakıda sovet hərbçiləri tərəfindən törədilmiş faciənin dəhşətlərindən danışmış, bunun bəşər tarixində görünməmiş qanlı hadisə olduğunu bildirmişdir. Natiq 20 Yanvar faciəsinin əsl mahiyyətinin beynəlxalq ictimaiyyətin diqqətinə çatdırılmasında və ona siyasi qiymət verilməsində ulu öndər Heydər Əliyevin misilsiz xidmətlərini vurğulamışdır.
Sonra 20 Yanvar faciəsinin dəhşətlərini əks etdirən videosüjet nümayiş etdirilmişdir.
Tədbirin sonunda Şuşa Dövlət Musiqili Dram Teatrı aktyorlarının ifasında ədəbi-bədii kompozisiya göstərilmişdir.
Bölmənin digər xəbərləri
