Tailandda Beynəlxalq Telekommunikasiya İttifaqının “İTU Telecom World” sərgi-konfransı işə başlamışdır
Banqkok, 19 noyabr (AZƏRTAC). Noyabrın 19-da Tailandın paytaxtı Banqkok şəhərində Beynəlxalq Telekommunikasiya İttifaqının ənənəvi illik “İTU Telecom World” sərgi-konfransı işə başlamışdır.
Tədbirdə Azərbaycanı rabitə və informasiya texnologiyaları naziri Əli Abbasovun başçılığı ilə nümayəndə heyəti təmsil edir. Nümayəndə heyətinin tərkibinə Rabitə və İnformasiya Texnologiyaları Nazirliyinin əməkdaşları ilə yanaşı, ölkəmizdə fəaliyyət göstərən informasiya-kommunikasiya texnologiyaları şirkətlərinin, qeyri-hökumət təşkilatlarının təmsilçiləri daxildir.
Rəsmi açılış mərasimində Beynəlxalq Telekommunikasiya İttifaqının baş katibi Hamadun Ture, Tailand Krallığının informasiya və kommunikasiya texnologiyaları naziri Anudit Nakorntap çıxış edərək builki sərgi-konfransın məqsədi, gözlənilən nəticələr barədə danışmışlar.
Sonra nümayəndə heyətlərinin rəhbərləri müxtəlif ölkələrin milli pavilyonlarından ibarət sərgi zalı ilə tanış olmuşlar.
Sərgidə Azərbaycanda informasiya-kommunikasiya texnologiyaları sahəsində son illər, xüsusən də Prezident İlham Əliyevin müvafiq Sərəncamı ilə “İnformasiya-kommunikasiya texnologiyaları ili” elan edilmiş cari ildə qazanılan nailiyyətlər və perspektiv layihələrin nümayiş olunduğu 150 kvadratmetr ölçüdə pavilyon fəaliyyət göstərir.
Azərbaycan pavilyonunu ziyarət edənlərə görülən işlər, qazanılan uğurlar, perspektiv layihələr haqqında məlumat verilmiş, mövzuya aid materiallar təqdim edilmişdir.
Noyabrın 22-dək davam edəcək tədbir çərçivəsində Azərbaycan nümayəndə heyətinin müxtəlif ölkələrin müvafiq qurumlarının rəhbərləri ilə ikitərəfli görüşləri, bölmə iclaslarında iştirakı nəzərdə tutulmuşdur.
Şahin Cəfərov
AZƏRTAC-ın xüsusi müxbiri
Banqkok
Bölmənin digər xəbərləri
