ELM VƏ TƏHSİL
Tarix Muzeyinin əməkdaşının məqaləsi beynəlxalq jurnalda dərc olunub
Bakı, 20 fevral, AZƏRTAC
Milli Azərbaycan Tarixi Muzeyinin əməkdaşı Şəfa Mövsümovun “Həzi Aslanovun 1941-1945-ci illərin müharibəsində keçdiyi döyüş yolu Azərbaycan sovet tarixşünaslığında” adlı elmi məqaləsi Ukraynada nəşr olunub.
Bu barədə AZƏRTAC-a muzeydən məlumat verilib. Bildirilib ki, Ukraynanın Vladimir Vernadski adına Tavriya Milli Universitetinin “Vçeni zapiski” jurnalında işıq üzü görən məqalədə iki dəfə Sovet İttifaqı Qəhrəmanı adına layiq görülmüş general-mayor Həzi Aslanovun döyüş yolu Azərbaycanın sovet dövrü tarixi əsasında tədqiq edilib. Həzi Aslanovun müəmmalı ölümü, ona ikinci dəfə Sovet İttifaqı Qəhrəmanı adının uzun müddət hansı səbəbdən verilməməsi kimi məsələlər araşdırılıb.
Qeyd edək ki, “Vçeni Zapiski” jurnalı “Copernicus international” beynəlxalq elmi bazasında indeksləşir.