TBİLİSİNİN QƏHRƏMANLAR MEYDANINDA GÜCLÜ PARTLAYIŞ BAŞ VERMİŞDİR

23.10.2004 [10:45]
Çap et
A⁺ A^-

AZƏRTAC-ın müxbiri xəbər verir ki, Tbilisidə, Gürcüstanın ərazi bütövlüyü uğrunda həlak olanların abidəsi yaxınlığında, Qəhrəmanlar meydanındakı yeraltı keçiddə güclü partlayış olmuşdur. Gürcüstan Dövlət Təhlükəsizliyi Nazirliyinin əməkdaşı David Roqavanın sözlərinə görə, partlayıcı maddə zibil qabına qoyulmuşdur. İlkin məlumata görə, bu, 400-600 qramlıq trotildir.

Xoşbəxtlikdən, hadisə nəticəsində tələfat və yaralananlar olmamışdır. Mütəxəssislər hadisə yerini nəzərdən keçirərkən üzərində “təcili” sözü yazılmış və Prezident Mixail Saakaşviliyə ünvanlanmış məktub tapmışlar. Məktub “nusxuri” - qədim gürcü əlifbası ilə yazılmışdır.

Xatırladaq ki, “nusxuri” əlifbasından IX-XI əsrlərdə, əsasən, kilsə ədəbiyyatında istifadə edilirdi.