TDT beynəlxalq səviyyədə mühüm geosiyasi aktora çevrilməkdədir - ŞƏRH
Bakı, 10 oktyabr, AZƏRTAC
Türk Dövlətləri Təşkilatının (TDT) Dövlət Başçılarının oktyabrın 7-də Qəbələdə keçirilən 12-ci Zirvə Görüşü Türk dünyasının həmrəyliyinin və institusionallaşmasının yeni müstəviyə keçdiyini nümayiş etdirdi. “Regional sülh və təhlükəsizlik” mövzusunda keçirilən Zirvə Görüşündə liderlərin səsləndirdiyi fikirlər, verdiyi mesajlar və qəbul edilən Qəbələ Bəyannaməsi birliyin gələcək fəaliyyəti üçün strateji əhəmiyyət kəsb edir.
Bunu AZƏRTAC-a açıqlamasında Milli Məclisin deputatı Günay Ağamalı söyləyib.
O bildirib ki, artıq TDT Avrasiya məkanında təkmilləşdirilmiş institusional arxitekturası olan, işlək maliyyə mexanizmləri fonunda rəqamsal gündəm formalaşdıran və nəqliyyat-logistika imkanları genişlənən bir güc mərkəzinə çevrilir. “Birliyimiz Mərkəzi Asiyadan Şərqi Aralıq dənizinə və Balkanlara qədər geniş coğrafiyanı əhatə edir. TDT-də hər bir ölkənin öz rolu və funksiyası var. Qardaş Türkiyə böyük iqtisadiyyatı və inkişaf etmiş texnoloji imkanları, Qazaxıstan zəngin təbii resursları, Azərbaycan enerji istehsalı və qovşağı, Özbəkistan, Türkmənistan və Qırğızıstan enerji və qiymətli torpaq elementləri, Şimali Kipr və Macarıstan isə üstün coğrafi mövqeyi ilə təşkilatın güclənməsində vacib rol oynayır. Bütün bu faktorlar Türk dünyasının vahid məkan kimi qlobal arenada yüksəlişini təmin edir. Bu mənada Qəbələ görüşü türk dövlətlərinin siyasi birliyinin və qarşılıqlı etimadın təcəssümüdür. Görüş zamanı Prezident İlham Əliyevin sülh, əməkdaşlıq, həmrəylik və inteqrasiya yönümlü çıxışı, eyni zamanda, digər dövlət rəhbərlərinin birlik mesajları onu deməyə əsas verir ki, TDT artıq regional platformadan çıxaraq beynəlxalq səviyyədə mühüm geosiyasi aktora çevrilməkdədir. Bu görüş ölkələrimiz arasında siyasi koordinasiyanın yeni mərhələsini açdı və qəbul edilən qərarlar fonunda təşkilat vahid mövqe ortaya qoydu. Prezident İlham Əliyevin uzaqgörən siyasəti nəticəsində Azərbaycan bu gün təkcə enerji və iqtisadi sahədə deyil, həm də Türk dünyasının gələcəyinə istiqamət verən strateji təşəbbüslərin qəbulu və siyasi inteqrasiyanın dərinləşməsində aparıcı mövqeyə malikdir”,- deyə G. Ağamalı vurğulayıb.
Deputat əlavə edib ki, Qəbələ Zirvəsinin mühüm istiqamətlərindən biri də məhz iqtisadi əməkdaşlığın gücləndirilməsi olub. “Təsadüfi deyil ki, TDT-yə üzv ölkələr bu gün dünya enerji bazarında, tranzit-logistika maşurtlarında mühüm üstünlüyə malikdir. Azərbaycanın həyata keçirdiyi genişmiqyaslı enerji-nəqliyyat layihələri, Transxəzər Beynəlxalq Nəqliyyat Marşrutu kimi təşəbbüslər və Zəngəzur dəhlizinin əhəmiyyəti görüş zamanı bir daha önə çəkildi. Bu təşəbbüslər Türk dünyasının coğrafi üstünlüklərini vahid logistik sistemdə birləşdirərək Avropa-Asiya xəttində ən qısa və təhlükəsiz nəqliyyat keçidləri formalaşdırır. Heç kimə sirr deyil ki, bu gün Avropanın enerji təlabatı və təhlükəsizliyi Avropa Birliyi üçün ən aktual mövzulardan biridir. Xüsusilə Ukrayna müharibəsinin yaratdığı risklər avropalıları alternativ mənbələr tapmağa sövq edir. Bu kontekstdə Azərbaycan, Qazaxıstan və Türkmənistan kimi enerji resursları zəngin dövlətlər önə çıxır və bu da öz növbəsində TDT-nin Avropa ilə yaxınlaşmasına vəsilə olur. Nəticə etibarilə TDT-nin Dövlət Başçılarının Qəbələdə keçirilən 12-ci Zirvə Görüşü Türk dünyasının gələcək perspektivlərinin və strategiyasının təməl daşlarından biri kimi tarixə düşdü. Bu görüş TDT-nin vahid siyasi iradəsini bir daha nümayiş etdirdi”, - deyə o diqqətə çatdırıb.
Bölmənin digər xəbərləri
