TƏBİİ FƏLAKƏTİN VURDUĞU ZİYANIN NƏTİCƏLƏRİ ARADAN QALDIRILIR
Martın 5-də Gədəbəydə baş verən təbii fəlakətin nəticələrini aradan qaldırmaq üçün respublikamızın ayrı-ayrı nazirlik və təşkilatlarının nümayəndələri rayonda təmir-bərpa işlərində yaxından iştirak edirlər. Gədəbəy Rayon İcra Hakimiyyətindən AZƏRTAC-ın müxbirinə demişlər ki, ölkəmizin başçısı İlham Əliyevin tapşırığı ilə rayona ezam edilmiş məsul şəxslər qarşıya çıxan bütün problemləri yerindəcə həll edirlər. Qısa vaxt ərzində rayon mərkəzinə elektrik enerjisinin verilməsi təmin edilmişdir. “Azərenerji” Səhmdar Cəmiyyətinin 21 nəfərdən ibarət briqadası ətraf kəndlərə gedən xətlərin bərpası ilə məşğuldur. Rayonun rabitə və qaz təsərrüfatı sisteminə dəyən ziyanın nəticələrinin aradan qaldırılması üçün operativ tədbirlər görülür. Evləri yanmış və uçmuş sakinlərin gündəlik məişət qayğıları da diqqət mərkəzindədir.
