Təbrizdə Anım Günü ilə bağlı tədbir keçirilib
Bakı, 29 sentyabr, AZƏRTAC
İranın Təbriz şəhərindəki Azərbaycan baş konsulluğunun inzibati binasında 27 Sentyabr – Anım Günü ilə əlaqədar tədbir keçirilib. Tədbir çərçivəsində sənədli film nümayiş etdirilib və fotosərgi təşkil olunub.
Baş konsulluqdan AZƏRTAC-a bildirilib ki, iştirakçılar Azərbaycanın azadlığı və ərazi bütövlüyü uğrunda canlarından keçmiş şəhidlərin xatirəsini bir dəqiqəlik sükutla yad ediblər.
Tədbirdə Türkiyənin Təbrizdəki baş konsulu Mete Zaimoğlu, baş konsulluğun əməkdaşları, bu şəhərdə yaşayan Azərbaycan Respublikası vətəndaşları və onların ailə üzvləri, Azad İslam Universitetinin azərbaycanlı tələbələri iştirak ediblər.
Tədbirdə çıxış edən baş konsul Əliyənnağı Hüseynov Azərbaycan xalqının dövlətçilik tarixinə qızıl hərflərlə yazılan Vətən müharibəsinin başlamasından beş il ötdüyünü diqqətə çatdırıb. O, dövlətimizin suverenliyi və ərazi bütövlüyü uğrunda canlarını fəda edən qəhrəman şəhidlərimizə Allahdan rəhmət, qazilərimizə möhkəm cansağlığı arzulayıb, otuz ilə yaxın işğal altında qalan torpaqlarımızın məhz onların qanı və canı bahasına yağı düşmənin tapdağı altından qurtulduğunu bildirib.
Baş konsul qeyd edib ki, Prezident, Müzəffər Ali Baş Komandan İlham Əliyevin 2020-ci il 2 dekabr tarixli Sərəncamına əsasən Vətən müharibəsinin başladığı günün – sentyabrın 27-sinin Anım Günü kimi qeyd edilməsi qəhrəmancasına döyüşmüş, ölkəmizin ərazi bütövlüyü uğrunda canlarını fəda etmiş şəhidlərimizə dərin ehtiramın ifadəsidir.
Baş konsul İkinci Qarabağ müharibəsi haqqında xronoloji qaydada məlumat verib, ermənilərin 44 günlük Vətən müharibəsi günlərində Azərbaycanın Gəncə, Bərdə şəhərlərində və digər yaşayış məntəqələrində dinc əhalini və mülki obyektləri hədəf aldığını faktlar əsasında təqdim edib.
Diplomat vurğulayıb ki, Müzəffər Ali Baş Komandan İlham Əliyevin rəhbərliyi ilə qəhrəman Azərbaycan Ordusunun 44 günlük Vətən müharibəsində qazandığı rəşadətli Qələbə müasir dünyanın hərb tarixinə qızıl hərflərlə yazılıb.
O əlavə edib ki, işğalçı Ermənistan Vətən müharibəsindən sonra da hərbi təxribatlardan əl çəkməyib. Yeni geosiyasi vəziyyətdə sülhə nail olmaq şanslarını əldən verən rəsmi İrəvan götürdüyü öhdəlikləri yerinə yetirmək istəmədi. Bütün bunlar azmış kimi, Azərbaycana qarşı hərbi güc tətbiq etmək planları quruldu. Bunun nəticəsində 2023-cü il sentyabrın 19-da Azərbaycanın Qarabağ bölgəsindəki erməni silahlı qüvvələri bir sıra genişmiqyaslı hərbi təxribatlar və terror hücumları törətdi. Azərbaycan Respublikasının Konstitusiya quruluşunun bərpa edilməsi, həmçinin törədilən fasiləsiz silahlı diversiya təxribatlarının qarşısını almaq məqsədilə Azərbaycan Silahlı Qüvvələri 2023-cü il sentyabrın 19-da lokal xarakterli antiterror tədbirləri həyata keçirib, cəmi 23 saat 43 dəqiqə ərzində erməni separatçıları ağ bayraq qaldırmağa məcbur olublar. Qarabağın erməni sakinlərinin nümayəndələrinin Rusiya sülhməramlı kontingenti vasitəsilə müraciətini nəzərə alaraq, tam atəşkəs haqqında razılaşma əldə olunub və 2023-cü il sentyabrın 20-də saat 13:00-da lokal xarakterli antiterror tədbirləri dayandırılıb. Beləliklə, 24 saatdan az müddətdə həyata keçirilən antiterror tədbirləri nəticəsində Azərbaycan ərazisində qanunsuz yerləşən Ermənistan qoşun hissələri tam şəkildə tərk-silah olunaraq ölkəmizi tərk edib. Qarabağda qeyri-qanuni xunta rejimi ləğv olunub, separatçıların əsas rəhbərləri həbs edilib və Azərbaycan öz dövlət suverenliyini tam təmin etməyə nail olub.
Qeyd olunub ki, Azərbaycan Respublikasının Prezidentinin 19 sentyabr 2024-cü il tarixli müvafiq Sərəncamı ilə sentyabrın 20-si Dövlət Suverenliyi Günü kimi təsis edilib. Azərbaycanın Zəfər tarixi Xankəndi, Xocalı, Ağdərə, Xocavənd, Əsgəranda üçrəngli Bayrağımızın yüksəldilməsi, ərazi bütövlüyümüzün tam bərpası ilə yekunlaşıb.
Bölmənin digər xəbərləri
