TEYMUR RƏCƏBOV SUPERTURNİRDƏ RUSİYA ŞAHMATÇISINA UDUZMUŞDUR
Bakı, 7 oktyabr (AZƏRTAC). Teymur Rəcəbov Çinin Nantszin şəhərində dairəvi sistem üzrə keçirilən superturnirin səkkizinci turunda Rusiya təmsilçisi Dmitri Yakovenkoya məğlub olmuşdur.
Qara fiqurlarla oynayan T.Rəcəbov 72-ci gedişdə rəqibinə uduzaraq, turnir cədvəlində sonuncu pilləyə enmişdir.
Turun digər görüşlərində M.Karlsen (Norveç) Van Yu (Çin), V.Topalov (Bolqarıstan) isə Peter Leko (Macarıstan) üzərində qələbə qazanmışdır.
Səkkiz turun nəticəsinə görə, M.Karlsen 6,5, V.Topalov 4,5, Van Yu, D.Yakovenko hərəyə 3,5, T.Rəcəbov və P.Leko hərəyə 3 xal toplamışlar.
Doqquzuncu turda D.Yakovenko-P.Leko, T.Rəcəbov-M. Karlsen, Van Yu-V.Topalov qarşılaşacaqlar.
Turnirin ümumi mükafat fondu 250 min avrodur. Yarışın qalibini 80 min avro mükafat gözləyir.
Bölmənin digər xəbərləri
