TƏYYARƏ QƏZASININ FACİƏVİ NƏTİCƏLƏRİ
Çin Beynəlxalq Aviasiya Şirkətinə məxsus mülki təyyarənin qəzaya uğraması nəticəsində həlak olanların sayı 119 nəfərə çatmışdır. 38 adam sağ qalmış, 9 nəfər isə itkin düşmüşdür. Bu barədə Koreya Respublikasının Renhap Agentliyi xəbər vermişdir.
Məlumatda deyilir ki, xilasedicilər sağ qalmış 54 nəfəri aşkar etmişlər, onların 16-sı xəstəxanada və yaxud yolda keçinmişdir. Yaralıların bəziləri hələ də ağır vəziyyətdə olduğundan ölənlərin sayı arta bilər.
Sinxua Agentliyinin məlumatına görə, aprelin 16-da səhər hadisə yerinə daha 2900 xilasedici yola düşmüşdür. Lakin yağışlar axtarış-xilasetmə işlərini çətinləşdirir.
Bazar ertəsi Çin beynəlxalq Aviasiya Şirkətinə məxsus “Boinq-767” mülki təyyarəsi Cənubi Koreyada qəzaya uğramışdır. Təyyarədə 155 sərnişin və 11 nəfərdən ibarət uçuş heyəti olmuşdur.
Bölmənin digər xəbərləri
