Türk general: Xalqlarımızın missiyası “Bir millət, iki dövlət, tək yumruq” tezisini irəli aparmaqdır
Bakı, 29 aprel, N.Məmmədova, AZƏRTAC
İndiki “TEKNOFEST” aerokosmik və texnoloji festivalı bir neçə səbəbdən əlamətdardır. İlk növbədə, bu tədbir Azərbaycan Prezidenti İlham Əliyevin İstanbula səfəri və türk xalqının onu qonaqpərvərliklə qarşılaması ilə yadda qaldı. Bununla yanaşı, yaxın gələcəkdə Azərbaycanda “Bayraktar Teknoloji” pilotsuz uçuş, o cümlədən zərbəçi aparatlarının istehsalı və onlara xidmət üzrə Mərkəzin yaradılacağı elan edildi. Beləliklə, bu kompaniyanın festivalda nümayiş olunan texnoloji yenilikləri tədbirin əsas hadisəsi oldu. Onlar qardaş Azərbaycan üçün də geniş şəkildə əlçatan olacaq.
Bu barədə AZƏRTAC-a Türkiyənin Azərbaycanda keçmiş hərbi attaşesi, general Yücel Karauz bildirib.
Agentliyin həmsöhbəti deyib: “İkincisi, dövlət başçılarının festivalın keçirildiyi məkana Prezident İlham Əliyevin idarə etdiyi Türkiyə istehsalı olan “Togg” elektromobilində gəlmələri diqqəti cəlb edən fakt oldu. Bu, mühüm mesajdır. Azərbaycan Prezidenti öz nitqində 44 günlük Vətən müharibəsində dəstəyə görə Türkiyəyə, Prezident Ərdoğana təşəkkürünü bildirdi. Bu, əhəmiyyətlidir. Digər tərəfdən, o, bizim münasibətləri qardaşlıq səviyyəsindən müttəfiqliyə yüksəldən Şuşa Bəyannaməsini xüsusi vurğuladı və bildirdi ki, Azərbaycan və Türkiyə həm müdafiə sənayesi məsələlərində, həm də müdafiə qabiliyyətinin möhkəmləndirilməsində birlikdə hərəkət edəcək. Bu kontekstdə onun bəyanatının yaxın vaxtlarda “Kızılelma”nın Azərbaycan səmasında uçacağı ilə bağlı ümidin ifadə olunduğu məqamını qeyd etmək lazımdır”.
Şuşa Bəyannaməsindən bəhs edən Y.Karauz bildirib ki, bu gün bütün regional və qlobal aktorlara növbəti dəfə bu sənədin təkcə Türkiyə və Azərbaycan arasında deyil, həm də Türk dünyası hüdudlarında qardaşlıq münasibətlərinin inkişafını təmin edəcəyi, eyni zamanda Cənubi Qafqazda təhlükəsizliyin təminatı olacağı mesajı verildi. Keçmiş hərbi attaşe hesab edir ki, bu regionda yanlış planlar quran, İkinci Qarabağ müharibəsindən sonra yaranan reallıqla barışmaq istəməyən və bütün vasitələrlə onlara məhəl qoymayan qüvvələr bunun üzərində düşünməlidir.
Türkiyəli general bugünkü tədbirin əlamətdar hadisələri arasında Türkiyə Prezidenti Rəcəb Tayyib Ərdoğanın Azərbaycan Prezidenti İlham Əliyevə Türk dünyasının böyük oğlu, Ulu Öndər Heydər Əliyevin anadan olmasının 100 illiyi münasibətilə hazırlanmış xatirə əsginasını təqdim etməsini və onun Kahramanmaraşda zəlzələdən zərərçəkənlər üçün Azərbaycan şəhərciyinin təməlinin qoyulması barədə bəyanatını göstərdi. Y.Karauz sonda deyib: “Mən onu Azərbaycan rayonu adlandırardım, belə ki, burada yaşayış binaları ilə yanaşı, məscid, məktəb, uşaq baxçası və başqa infrastruktur obyektləri tikiləcək. Tikinti işlərinin bir il çəkəcəyi gözlənilir, bu, belə böyük layihə üçün yetərincə qısa müddətdir. Bütün bunlar çoxəsrlik tarixi ənənələrə söykənən Türkiyə-Azərbaycan qardaşlığının nümunəvi olmasından xəbər verir. Eyni zamanda, bunlar festivalda səslənən genişməzmunlu tezisdə ifadə olunub: “Bir millət, iki dövlət, tək yumruq”. Bu şüar yüzilliklər boyu aktual olub. Bizim xalqların üzərinə onu bütün sahələrdə həyata keçirmək missiyası və bu hədəfi irəli aparmaq vəzifəsi düşür”.
Bölmənin digər xəbərləri
