Türkiyə-Azərbaycan türk film günlərinin qala gecəsi olub
Bakı, 26 sentyabr, AZƏRTAC
Nizami Kino Mərkəzində 8-ci Türkiyə-Azərbaycan türk film günlərinin qala gecəsi keçirilib.
AZƏRTAC xəbər verir ki, film günləri Türkiyənin Mədəniyyət və Turizm Nazirliyi Kino Baş İdarəsi, Azərbaycan Mədəniyyət Nazirliyi, Azərbaycan Respublikası Kinematoqrafiya Agentliyi, eləcə də Türkiyənin ölkəmizdəki səfirliyinin dəstəyi, Yerli Düşüncə Cəmiyyətinin təşkilatçılığı ilə reallaşır.
Tədbirin fəxri qonaqları sırasında Türkiyənin tanınmış kinoaktrisası, “Yeşilçam”ın ulduzu və Türkiyə Prezidentliyi Mədəniyyət və İncəsənət Siyasəti Şurasının üzvü Hülya Koçyiğit olub. Gecəyə “Savaşçı” serialının baş rol ifaçısı Berk Oktay, “Aşk Bağları” filminin aktyorları Anıl Altan və Duyğu Mercan, eləcə də tanınmış musiqiçi Arslanbek Sultanbekov da qatılıb.
Açılışda çıxış edən Azərbaycanın mədəniyyət nazirinin müavini Səadət Yusifova tədbirin yalnız kino nümayişi deyil, Türk dövlətlərinin mədəni birliyinin, tarixi yaddaşının və qardaşlıq münasibətlərinin sənət dili ilə ifadəsi olduğunu bildirib. O, son illər Türk dünyasında mədəni əməkdaşlığın yeni mərhələyə qədəm qoyduğunu deyib: “2023-cü ildə TÜRKSOY-un təşəbbüsü ilə yaradılan Türk Film Türk Dünyası Kino İdarəçiliyi Birliyi, 2024-cü il noyabrın 6-da Türk Dövlətləri Təşkilatı Dövlət Başçılarının 11-ci Zirvə görüşündə qəbul edilən Bişkek Bəyannaməsinin 98-ci maddəsi və orada təsbit edilən Türk Dünyası Film Fondunun yaradılması təşəbbüsü bu prosesin əhəmiyyətli mərhələsidir. 2025-ci il iyulun 18-də Türk Dünyası Kino Rəhbərlərinin ikinci görüşündə bu istiqamətdə artıq İşçi qrup da yaradılıb. Məqsəd ortaq kino məkanı, ortaq istehsal mühiti və ortaq yayım imkanlarını formalaşdırmaqdır".
Nazir müavinin sözlərinə görə, Azərbaycan bu prosesdə hər zaman fəal və təşəbbüskar tərəf kimi çıxış edib. "Azərbaycan Prezidenti İlham Əliyevin strateji baxışı nəticəsində ölkəmiz türk dünyası ilə mədəni əməkdaşlığın dərinləşməsinə mühüm töhfələr verir. İstanbulda keçirilən Azərbaycan Kino Günləri və bu gün Bakıda təşkil edilən Türk Film Günləri həftəsi və eyni zamanda, Azərbaycan və Türkiyə tərəfindən birgə istehsal olunmuş, hazırda istehsalat və postprodakşn mərhələsində olan layihələr bu əməkdaşlığın əsas göstəriciləridir", - deyə Səadət Yusifova əlavə edib.
Nazir müavini onların sırasında "Molla Nəsrəddin", "Çətin günlərin dostu", "Ölü Həsən", "Üç kiloqramlıq xoşbəxtlik", "Azıx mağarası", "Nargin" filmlərini xüsusi qeyd edib. Ümumilikdə 10-a yaxın film layihəsinə dəstək göstərilmiş və bu istiqamətdə 5 milyon manatdan artıq maliyyə vəsaiti ayrılıb. "Qeyd edək ki, hər il müxtəlif ölkələrdə keçirilən Qorqud Ata Film Festivalı artıq ortaq mədəni platforma kimi qəbul olunur. Bu il festival oktyabrın 1-dən 5-dən Türk dünyasının mədəniyyət paytaxtı Aktauda keçiriləcək. Qardaş Qazaxıstandan festivalın təşkili işində uğurlar arzulayırıq. Əminik ki, qarşıdakı illərdə də bu əməkdaşlıq daha da dərinləşəcək, ortaq kino məktəbləri, yayım platformaları və müasir texnoloji mərkəzlər yaradılacaq. Azərbaycan-Türkiyə əməkdaşlığı kinematoqrafiya sahəsində də yeni nailiyyətlərə yol açacaq", - deyə Səadət Yusifova vurğulayıb.
Türkiyənin Azərbaycandakı səfiri Birol Akgün son illərdə türk film sənayesinin inanılmaz bir irəliləyiş yaşadığını diqqətə çatdırıb. Səfir dünyada kino sənayesinin çox çətin sahə olduğunu deyib: "Türkiyə serial və kinematoqrafiya sektorunda Amerikadan sonra bədii malların ixracına görə dünyada ikinci ölkədir. Ölkəmizdəki kino sektorumuz mədəni baxımdan nə qədər inkişaf etdiyini göstərir".
O, iki ölkəni birləşdirən və xalqlar arasında dostluq və qardaşlıq bağlarını möhkəmləndirəcək film günlərinin çox vacibliyini qeyd edib: "Türk dünyası bir-birini daha yaxşı tanımalıdır. Film sənayemizin inanılmaz gücü var".
Sonra tamaşaçılara milli rəqslər nümayiş olunub.
Gecədə kinematoqrafiyanın inkişafındakı xidmətlərinə görə iki ölkənin film istehsalçıları və rol ifaçıları mükafatlandırılıb. Həmçinin Türkiyənin məşhur aktrisası Hülya Koçyiğit Azərbaycan Mədəniyyət Nazirliyinin Fəxri Diplomuna layiq görülüb.
Daha sonra məşhur “Gəlin” filmi nümayiş olunub.
Qeyd edək ki, filmlərin nümayişi ödənişsiz olacaq və tamaşaçılar 5 gün ərzində türk kinematoqrafiyasının seçilmiş nümunələrini izləmək imkanı əldə edəcəklər.
Bölmənin digər xəbərləri
