TÜRKİYƏ ƏFQANISTANDAKI BEYNƏLXALQ HƏRBİ KONTİNGENTƏ BAŞÇILIQ ETMƏYƏ PRİNSİPİAL RAZILIĞINI VERMİŞDİR
Türkiyə Əfqanıstandakı beynəlxalq sülhməramlı kontingentə altı ay müddətinə başçılıq etməyə prinsipial razılığını bildirmişdir. Ölkənin Milli Təhlükəsizlik Şurasının qəbul etdiyi bu qərar barədə Ankara artıq ABŞ-a və Böyük Britaniyaya xəbər vermişdir.
İTAR-TASS-ın yaydığı məlumata görə, komandanlığı qəbulu ilə bağlı əlaqədar texniki məsələləri həll etmək üçün Türkiyə Silahlı Qüvvələri quru qoşunlarının yüksək rütbəli nümayəndələri bazar günü Kabilə yola düşürlər.
Türkiyə sülhməramlı qüvvələrə may ayında, Böyük Britaniyanın mandatının müddəti başa çatdıqdan sonra başçılıq edə bilər. Bu halda onun sülhməramlı qüvvələrin sayı min nəfərə çatdırıla bilər. Hazırda orada 261 türk hərbi qulluqçusu vardır.
Rəsmi Ankara Əfqanıstandakı sülhməramlı qüvvələrə başçılıq etməyə hazır olduğunu dəfələrlə bəyan etmişdir, lakin bunun müqabilində ona maliyyə yardımı göstərməyə çağırmışdır. ABŞ bur qədər əvvəl Türkiyəni əmin etmişdir ki, bu yaxınlarda sülhməramlı məqsədlər üçün ona 228 milyon dollar ayırmaq barədə qərar təsdiq üçün Amerika Konqresinə təqdim olunacaqdır.
Bölmənin digər xəbərləri
