DÜNYA
Türkiyə Prezidenti: Fəlakət zonasında əməliyyatlarda iştirak edənlərə dövlət mükafatları təqdim ediləcək
![Türkiyə Prezidenti: Fəlakət zonasında əməliyyatlarda iştirak edənlərə dövlət mükafatları təqdim ediləcək](/files/2023/1/1200x630/1682434597583666685_1200x630.jpg)
Bakı, 25 aprel, AZƏRTAC
Türkiyə Prezidenti Rəcəb Tayyib Ərdoğan bildirib ki, fevral zəlzələsinin dağıdıcı fəsadlarının aradan qaldırılması üzrə əməliyyatlarda iştirak etmiş 55 min xilasediciyə dövlət mükafatları təqdim ediləcək.
AZƏRTAC Anadolu agentliyinə istinadla xəbər verir ki, dövlət başçısı bu xilasedicilərin yalnız Türkiyə vətəndaşları deyil, həm də əcnəbilər olduğunu qeyd edib. O, həmçinin diqqəti faciənin miqyasına və ölkənin zərər görmüş bölgələrinin bərpası üzrə görülən işlərə yönəldib. Rəcəb Tayyib Ərdoğan bildirib ki, son hesablamalara görə, fevral zəlzələsi zamanı Türkiyə ərazisində 872 min yaşayış binası yararsız vəziyyətə düşüb. Bundan başqa, fəlakət zonasında 321 məntəqədə 781 500 çadır və 77 min mobil evlər quraşdırılıb, çökən binaların 57 minindən 50 mini dağıntılardan təmizlənib. Cənubdakı Hatay əyalətində də dağıntılar tezliklə təmizlənəcək.
Türkiyə Prezidenti daha sonra qeyd edib ki, ölkənin fəlakət zonasında 113 min yaşayış binasından 47 mininin təməli qoyulub, artıq tikinti işlərinə start verilib. O, əmin olduğunu bildirib ki, fevral fəlakətinin nəticələrinin aradan qaldırılması üzrə işlər həmin əyalətlərin tam bərpasına qədər davam edəcək.