Türkiyə Prezidenti gələcək nəsillərə daha güclü Türk dünyası miras qoymağa çağırıb
Ankara, 7 oktyabr, AZƏRTAC
Türkiyə ortaq türk əlifbasının yaradılması istiqamətində ilk addımı atıb. Yazıçı Çingiz Aytmatov haqqında kitab, eləcə də “Oğuznamə” toplusu artıq ölkəmizdə ortaq əlifba ilə çapa hazırdır.
AZƏRTAC xəbər verir ki, bu fikirləri Türkiyə Prezidenti Rəcəb Tayyib Ərdoğan Türk Dövlətləri Təşkilatına üzv ölkələrin Dövlət Başçıları Şurasının Qəbələdə keçirilən 12-ci Zirvə Görüşündə çıxışı zamanı deyib.
Onun sözlərinə görə, kitabların ilk nüsxələri Qəbələdə keçiriləcək TDT Zirvə Görüşü iştirakçılarına paylanacaq.
Prezident Ərdoğan bildirib ki, TDT ölkələri öz elmi və texnoloji inkişaflarında layiqli yer tuta biləcək və bunu əldə etmək yalnız sıx əməkdaşlıqla mümkündür.
Türkiyə lideri, həmçinin türk xalqlarının mədəni irsini qorumaqla yanaşı, süni intellekt texnologiyalarını da fəal şəkildə inkişaf etdirəcək “Böyük türk dili” modelinin daha fəal inkişafının vacibliyini vurğulayıb.
Türkiyə dövlətinin başçısı bildirib: “Bu gün biz bir daha nümayiş etdiririk ki, həmrəylik, qarşılıqlı hörmət, qardaşlıq ruhunda irəliləyən türk dövlətləri öz gələcəyinə inamlıdır. Bizim övladlarımıza miras olaraq daha güclü Türk dünyasını buraxmaq üçün hər cür imkanımız var”.
Türkiyənin yerləşdiyi bölgədə baş verənlərə gəlincə, Prezident Ərdoğan qonşu Suriyadakı vəziyyətə diqqət çəkib. O, türk ölkələri ilə Dəməşq arasında əlaqələrin intensivləşəcəyinə ümid etdiyini bildirib.
Türkiyə Prezidenti qonaqpərvərliyə görə Azərbaycan Prezidenti İlham Əliyevə minnətdarlığını ifadə edib, planlaşdırılan Qəbələ Bəyannaməsinin TDT-də bütün ölkələrin maraqlarının təmin edilməsinə töhfə verəcəyinə ümidvar olduğunu bildirib.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
