Türkiyədə son 55 ilin ikinci ən isti yay fəsli qeydə alınıb
İstanbul, 16 oktyabr, Günel Karatepe, AZƏRTAC
Hidrometeoroloqlar ötən yay fəslini dünya üzrə son illərin ən isti müvafiq dövrlərindən biri kimi qeydə alıblar. Hazırda dünyada hökm sürən qlobal istiləşmədən təsirlənən ölkələrdən biri də Türkiyədir. Belə ki, ölkə üzrə bu ilin iyun-avqust ayları son 55 ilin ən isti ikinci yay fəsli kimi qeydə alınıb.
AZƏRTAC xəbər verir ki, ölkənin Hidrometeorologiya Baş İdarəsinin məlumatlarına əsasən, Türkiyədə uzun illər yay fəsli üzrə orta temperatur 24 dərəcə təşkil edib. Bu ilin eyni dövründə isə hava temperaturu 1,5 dərəcə artaraq 25,5 dərəcə olub. Ən yüksək temperatur 50,5 dərəcə ilə Şırnak vilayətinin Silopi rayonunda qeydə alınıb. İyulun 25-də ölçülən bu dərəcə Türkiyənin yeni maksimum temperatur rekordu olaraq müəyyən edilib.
Ümumiyyətlə, Türkiyədə 1971-2025-ci illər arasında ən isti yay fəsli 26,1 dərəcə ilə 2024-cü ildə müşahidə olunub. Bu ilin yay fəsli isə 25,5 dərəcə ilə son 55 ilin ən isti ikinci yayı kimi qeydə alınıb.
Bölmənin digər xəbərləri
