Türkiyədə Xocalı soyqırımının 22-ci ildönümünə həsr olunmuş silsilə tədbirlər keçiriləcəkdir
Bakı, 17 fevral (AZƏRTAC). Türkiyədə Xocalı soyqırımının 22-ci ildönümünə həsr olunmuş silsilə tədbirlər keçiriləcəkdir. Paytaxt Ankaranın Keçiörən bələdiyyəsində, İstanbul şəhərində, Uşak vilayətində və digər bölgələrdə Xocalı şəhidlərinin xatirəsinə ucaldılmış abidələrin açılış mərasimləri olacaqdır.
Milli Məclisin deputatları həmin tədbirlərdə iştirak edəcəklər. Bu məqsədlə deputatlar Elman Məmmədov və Aqil Abbasov fevralın 18-dən 27-dək İstanbul şəhərində olacaq, nüfuzlu elm və təhsil ocaqlarında, bələdiyyələrdə, ictimai qurumlarda təşkil edilən anım mərasimlərinə qatılacaqlar.
Milli Məclisin regional məsələlər komitəsinin sədri Arif Rəhimzadə və deputat Rüstəm Xəlilov isə fevralın 24-dən 27-dək Ankarada səfərdə olacaqlar. Deputatlarımız burada keçiriləcək tədbirlərdə Xocalı faciəsi barədə məlumat verəcək, XX əsrin bu dəhşətli qətliamına dair sənədləri nümayiş etdirəcək, mövcud faktları bir daha Türkiyə ictimaiyyətinin diqqətinə çatdıracaqlar.
Bölmənin digər xəbərləri
