Türkiyədə “Xocalıya ədalət həftəsi” çərçivəsində silsilə tədbirlər keçiriləcəkdir
Bakı, 19 fevral (AZƏRTAC). Xocalı faciəsinin 22-ci ildönümü ilə əlaqədar Türkiyədə silsilə tədbirlərdən ibarət “Xocalıya ədalət həftəsi” keçiriləcəkdir.
AZƏRTAC xəbər verir ki, həftə çərçivəsində fevralın 20-də İstanbulda, Eminönü Xalq Təhsil Mərkəzinin konfrans zalında “Qarabağın işğalı və Xocalı qətliamı”, ayın 22-də Yunus Əmrə Mədəniyyət Mərkəzində “Qarabağın strateji əhəmiyyəti və statusu”, fevralın 24-də Mərmərə Universitetinin Heydərpaşa korpusunda “Qarabağın işğalı və Qafqazın tarixi”, fevralın 25-də Üsküdər Universitetində “1915-ci il hadisələri və müasir dövrdə türk-erməni münasibətləri” mövzularında tədbirlər təşkil ediləcəkdir.
“Xocalıya ədalət həftəsi”nə fevralın 26-da Mərmərə Universitetinin Göztəpə korpusunda keçiriləcək bağlanış proqramı ilə yekun vurulacaqdır.
Bundan başqa, faciənin 24-cü ildönümü ilə bağlı Xəzər Strateji İnstitutu (HASEN) tərəfindən İstanbulda “Qarabağda etnik təmizləmə və Xocalı faciəsi” mövzusunda “dəyirmi masa” keçiriləcəkdir.
Tədbirə HASEN-in Xarici Siyasət və Təhlükəsizlik Tədqiqatları Mərkəzinin mütəxəssisi, professor Mesut Hakkı Çaşın moderatorluq edəcəkdir.
“Dəyirmi masa”da Azərbaycanın Türkiyədəki səfiri Faiq Bağırov, İpək Universitetinin insan və cəmiyyət elmləri fakültəsinin dekanı, professor Kamal Çiçək, Kadir Has Universitetinin beynəlxalq münasibətlər kafedrasının müdiri Mitat Çelikpala çıxış edəcəklər.
Bölmənin digər xəbərləri
