TÜRKİYƏDƏ ZƏLZƏLƏLƏR ƏHALİNİNNARAHATLIĞINA SƏBƏB OLMUŞDUR
AZƏRTAC-ın xüsusi müxbiri xəbər verir ki, iyunun 4-də və 5-də Türkiyənin müxtəlif bölgələrində 6 zəlzələ qeydə alınmışdır. İstanbulun Kandilli seysmoloji mərkəzinin məlumatına görə, iyunun 4-də yerli vaxtla axşam saat 22.45-də mərkəzi Egey dənizində Rixter cədvəli ilə 4,0 bal, iyunun 5-də saat 5.16 radələrində Ərzincan vilayətinin Çayırlı rayonunda 3,4 bal, saat 5.20-də Çorum vilayətinin Məcidözü rayonunda 3,3 bal, saat 6.18-də Bursa vilayətinin İnəgöl rayonunda 2,9 bal və saat 17.27 radələrində mərkəzi Mərmərə dənizində 2,6 bal gücündə zəlzələlər olmuşdur. Tələfat və dağıntı olmasa da, bu seysmik fəallıq əhali arasında böyük narahatlıq yaratmışdır. Bir neçə ildir ki, bəzi seysmoloqlar Türkiyə ərazisində yer təkində geoloji təbəqələrin sürtüşməsi nəticəsində yaranan yüksək enerjinin güclü zəlzələ ilə üzə çıxa biləcəyini nəzərə çatdırırlar. Hətta Mərmərə dənizində zəlzələnin Rixter cədvəli ilə 7 baldan güclü olacağı ehtimal edilir.
Bölmənin digər xəbərləri
