Türkiyəli nazir müavini: Azərbaycanda texnoloji sistemin inkişafı üçün zəmin var
Bakı, 30 noyabr, AZƏRTAC
Son 20 il ərzində Türkiyə çox uğurlu, yaxşı inkişaf etmiş texnologiya ekosisteminin yaradılmasına nail olub.
AZƏRTAC xəbər verir ki, bunu Bakıda keçirilən “InMerge Innovation Summit”də Türkiyənin sənaye və texnologiya nazirinin müavini Zekeriya Çoştu deyib.
Nazir müavini bildirib ki, 20 il əvvəl Türkiyədə texnoloji ekosistem yox səviyyəsində idi.
“Türkiyədə 100-dən çox texnopark tikilib, minlərlə startap və texnologiya şirkəti yaradılıb. Bu addımlar sayəsində ölkə güclü texnoloji sistemə sahib olub. Azərbaycanda texnoloji sistemin inkişafı üçün yaxşı zəmin var. Türkiyə ilə Azərbaycan bu sahədə sıx əməkdaşlıq edir. İnnovasiyaların inkişafı və fəaliyyət dairəsinin genişləndirilməsi ümumilikdə dünyanın iqtisadi transformasiyasına gətirib çıxarır”, - deyə qardaş ölkənin nazir müavini əlavə edib.
Gələcəkdə qeyd edilən sahə üzrə daha da yaxşı nəticələr əldə ediləcəyini vurğulayan Zekeriya Çoştu bildirib ki, bunun üçün əsas məqam ölkədə təhsil imkanlarının yaradılması və yetişdirilən istedadlı kadrların ölkədə qalması üçün şərait formalaşdırmaqdır: “Hər iki ölkədə, həm Türkiyə, həm Azərbaycanda bu istiqamətdə işlər görülür”.
Bölmənin digər xəbərləri
