TÜRKİYƏNİN “QALATASARAY” FUTBOL KLUBUNUN SABİQ KAPİTANI BÜLENT KORKMAZ AZƏRBAYCANDA ÇALIŞMAQ İSTƏDİYİNİ BİLDİRMİŞDİR
Bakı, 21 yanvar (AZƏRTAC). Azərbaycanda səfərdə olan Türkiyə milli komandasının və “Qalatasaray” futbol klubunun sabiq kapitanı Bülənt Korkmaz mətbuat konfransı keçirmişdir.
Bülənt Korkmaz jurnalistlərlə görüşündə bildirmişdir ki, “Azərbaycanda mənə qarşı sevgi və diqqətin olduğunu bilirdim. Lakin bunun bu səviyyədə olduğunu gözləmirdim. Elə bu səbəbdən də gördüklərim məni çox həyəcanlandırdı. Mərhum Prezidentiniz Heydər Əliyevin “Biz bir millət, iki dövlətik” sözlərinin nə dərəcədə həqiqət olduğuna bir daha əmin oldum”. Xatırladaq ki, bu, sabiq kapitanın ölkəmizə ikinci səfəridir.
“Bura “Bakı” klubunun rəhbərliyinin dəvəti ilə gəlmişəm. Mənə göndərdikləri bu dəvət üçün onlara təşəkkürümü bildirirəm” söyləyən Bülent Korkmaz onu da bildirmişdir ki, “Həyatda hər bir şey mümkündür. Gələcəkdə “Bakı” və ya Azərbaycanın başqa bir klubundan hansısa bir təklif alsam, mütləq bu barədə düşünəcəyəm. Çünki burada işləmək mənim üçün çox maraqlı olardı”.
Bölmənin digər xəbərləri
