Türkmənistan ÜST-ə regional epidemiologiya mərkəzi yaratmağı təklif edib
Aşqabad, 16 noyabr, AZƏRTAC
Türkmənistan və Ümumdünya Səhiyyə Təşkilatı (ÜST) arasında əməkdaşlığa dair yol xəritəsi layihəsi ətrafında fikir mübadiləsi aparılıb.
Türkmənistanın xarici işlər naziri Rəşid Meredov ÜST-nin Avropa regionunda fövqəladə hallar üzrə regional direktoru Dorit Nitsanın rəhbərlik etdiyi nümayəndə heyəti ilə görüşündə Türkmənistan tərəfinin bir sıra təşəbbüsünü qonaqların diqqətinə çatdırıb.
AZƏRTAC xəbər verir ki, Türkmənistan Xarici İşlər Nazirliyinin mətbuat xidmətindən verilən məlumata görə, Türkmənistan tərəfi Mərkəzi Asiya Regional Epidemiologiya, Virusologiya və Bakteriologiya Mərkəzinin yaradılması, həmçinin Türkmənistanda Epidemiologiya, Virusologiya və Bakteriologiya Elmi-İstehsalat Mərkəzinin tikilməsini təklif edib.
Tərəflər əməkdaşlığın yol xəritəsi layihəsi ətrafında fikir mübadiləsi aparıb, birgə razılaşmaların həyata keçirilməsinin sürətləndirilməsi məqsədilə mütəmadi görüşlərin yüksək səviyyədə təşkili məsələləri müzakirə olunub.
Mətbuat xidmətinin məlumatına görə, Regional Epidemiologiya Mərkəzinin layihəsinin planlaşdırılması və inkişaf etdirilməsi zamanı "vahid səhiyyə" konsepsiyasının tətbiqi, səhiyyə informasiya bazasının inkişafı və "rəqəmsal tibb" təklifləri də müzakirə olunub.
İlahə Əhmədova
AZƏRTAC-ın xüsusi müxbiri
Aşqabad
Bölmənin digər xəbərləri
