TÜRKPA-nın Ankara Bəyannaməsində Azərbaycan üçün bir sıra vacib məsələlər yer alıb
Bakı, 29 aprel, AZƏRTAC
Xəbər verdiyimiz kimi, aprelin 27-28-də Türkiyənin paytaxtı Ankara şəhərində Türk Dövlətləri Parlament Assambleyasının (TÜRKPA) XII Plenar İclası keçirilib. İclas Ankara Bəyannaməsinin qəbul olunması ilə başa çatıb.
Milli Məclisin Mətbuat və ictimaiyyətlə əlaqələr şöbəsindən AZƏRTAC-a bildirilib ki, Bəyannamədə Azərbaycan üçün bir çox vacib məsələlər əksini tapıb. Belə ki, sənəddə bir-birinin suverenliyinin, ərazi bütövlüyünün və sərhədlərinin toxunulmazlığının qarşılıqlı tanınması və qarşılıqlı hörmət əsasında Azərbaycan ilə Ermənistan arasında münasibətlərin normallaşdırılmasına dəstək bir daha təsdiqlənir, bu prosesin Cənubi Qafqazda davamlı sülhün, sabitliyin əldə edilməsində mühüm amil olacağına inam ifadə olunur.
Sənəddə, həmçinin qovulmuş etnik azərbaycanlıların hüquqlarının təmin edilməsinə, beynəlxalq proses çərçivəsində öz evlərinə təhlükəsiz və ləyaqətli şəkildə qayıtmaları üçün dinc səylərinə dəstək ifadə olunur. Bu, Cənubi Qafqazda regional barışıq və normallaşma üçün mühüm məqam hesab edilir.
Bəyannamədə münaqişədən sonra davam edən bərpa, yenidənqurma və reinteqrasiya səylərində Azərbaycan ilə həmrəylik ifadə olunur, üzv və müşahidəçi dövlətlər bu prosesə dəstək və töhfə verməyə dəvət edilir. Eyni zamanda, bu istiqamətdə əldə etdiyi nailiyyətlər, o cümlədən işğaldan azad edilmiş ərazilərin bərpasında və regionun beynəlxalq nəqliyyat və logistika mərkəzinə çevrilməsində mühüm rol oynayan Füzuli və Zəngilan beynəlxalq hava limanlarının açılması münasibətilə Azərbaycana təbrik ünvanlanır.
Təşkilata üzv dövlətlər, həmçinin Qarabağ iqtisadi rayonunda Azərbaycanın təbii sərvətlərinin qeyri-qanuni istismarı və onların Laçın-Xankəndi yolu ilə qanunsuz dövriyyəsi ilə bağlı vətəndaş cəmiyyəti nümayəndələrinin və ekologiya fəallarının narahatlığını nəzərə alır, 2020-ci il 10 noyabr tarixli üçtərəfli Bəyanat çərçivəsində müstəsna olaraq humanitar məqsədlər üçün nəzərdə tutulan bu yoldan sui-istifadəyə qarşı keçirilən dinc etiraz aksiyaları ilə həmrəy olduqlarını bildirirlər.
Qoşulmama Hərəkatına (QH) və onun Parlament Şəbəkəsinin (QHPŞ) Azərbaycan sədrliyinin Hərəkat çərçivəsində əməkdaşlığın gücləndirilməsinə verdiyi töhfə Bəyannamədə yüksək qiymətləndirilir. Bu il martın 9-11-də “Dünya bu gün: çağırışlar və ümidlər” mövzusunda X Qlobal Bakı Forumunun uğurla təşkil edilməsi münasibətilə də Azərbaycana təbrik ifadə olunub.
Sənəddə siyasi müdrikliyi və rəhbərliyi ilə Azərbaycanın dövlətçilik və inkişaf tarixində silinməz iz qoymuş Azərbaycan xalqının Ümummilli Lideri Heydər Əliyevin 100 illiyi münasibətilə Azərbaycanda 2023-cü ilin “Heydər Əliyev İli” elan olunması alqışlanır.
TÜRKPA-ya üzv dövlətlərin təmsilçiləri motivindən asılı olmayaraq, bütün forma və təzahürlərində terrorizmi birmənalı şəkildə pisləyir və terrorizmə qarşı güclü həmrəylik nümayiş etdirirlər. Həmçinin təhlükəsizlik sahəsində əməkdaşlığın inkişaf etdirilməsində parlamentlərin rolunu vurğulayır, üzv dövlətləri terrorizm, radikalizm, terrorizmə səbəb olan ekstremizm və separatizmə qarşı mübarizədə əməkdaşlığı genişləndirməyə və bu məqsədlə beynəlxalq forumlarda səyləri əlaqələndirməyə çağırırlar.
Digər mühüm məqam sənəddə Azərbaycanın Tehrandakı səfirliyinə qarşı törədilən silahlı hücumun pislənilməsi və bütün təqsirkarların məsuliyyətə cəlb edilməsi üçün tez və hərtərəfli araşdırmanın aparılmasına çağırışın edilməsidir.
Bölmənin digər xəbərləri
