TURNİR SONA ÇATIR
AZƏRTAC xəbər verir ki, Hollandiyanın Veyk-an-Zeye şəhərciyində keçirilən ənənəvi beynəlxalq şahmat turniri finişə yaxınlaşır. Yanvarın 26-da, birgünlük istirahətdən sonra yarış iştirakçıları - dünyanın aparıcı qrossmeysterləri baş mükafat uğrunda mübarizəni davam etdirəcəklər. Onların hərəsi bir neçə görüş keçirməlidir. Odur ki, şahmat “meydanlarında” mübarizənin gərginliyi son həddə çatmışdır.
Hər halda, bir çox icmalçılar turnirdə vəziyyəti məhz belə qiymətləndirirlər. Onlar gənc qrossmeysterimiz Teymur Rəcəbovun növbəti uğurunu xüsusi vurğulayırlar. 10-cu turda o, rusiyalı Pyotr Svidlerlə heç-heçə oynayaraq, 6,5 xalla ikinci yeri özündə saxlamışdır.
11-ci turda bakılı dünya şahmat tacı uğrunda matçın qalibi moskvalı Vladimir Kramniklə qarşılaşacaqdır. Bu görüşdə kimin qalib gələcəyi barədə heç kim fikir söyləməyə risk etmir. Rusiya şahmatçısı 6 xal toplamış və bir qrup idmançı ilə ilk yerlərdən birinə namizəddir. Son turlarda hind qrossmeysteri Vişvanatan Anand da uğurla oynayır. O, liderlərə xeyli yaxınlaşmışdır.
Turnir cədvəlinə isə bolqar Veselin Topalov başçılıq edir. O, növbəti qələbədən sonra Rəcəbovu bir xal geridə qoyur.
Bölmənin digər xəbərləri
