Ukrayna saytında ümummilli lider Heydər Əliyev haqqında məqalə yerləşdirilib
Kiyev, 1 may, AZƏRTAC
Ukraynanın “Versii” saytında soydaşımız, hüquq elmləri doktoru, Milli Aviasiya Universitetinin beynəlxalq hüquq kafedrasının professoru, Ukraynanın Əməkdar Təhsil İşçisi Arif Quliyevin ümummilli lider Heydər Əliyevə həsr olunmuş “Heydər Əliyevin bütün sözləri və vədləri əməllərində təsdiqini tapıb” sərlövhəli məqaləsi yerləşdirilib.
AZƏRTAC xəbər verir ki, məqalədə Azərbaycan xalqının həyatında bir çox əlamətdar hadisələrin Heydər Əliyevin adı ilə bağlı olduğu qeyd edilir. Bildirilir ki, bu dahi, müdrik və qətiyyətli insanın liderliyi olmasaydı, gənc dövlətin taleyinin necə olacağını təsəvvür etmək belə çətindir.
Diqqətə çatdırılır ki, ümummilli lider Heydər Əliyevin zəngin tərcümeyi-halı parlaq və əlamətdar hadisələrlə doludur. Sovet dövründə o, yüksək dövlət vəzifələrinə təyin edilib, respublikanın, sonra isə müstəqil Azərbaycanın birinci şəxsi olub, lakin özünü heç vaxt insanlardan yuxarıda deyil, onlarla birlikdə, onların arasında hiss edib. Heydər Əliyev həssas və qayğıkeş insan kimi hər zaman xalqın sadə nümayəndələrinin ehtiyaclarına diqqətlə yanaşıb. O, məhz bu keyfiyyəti ilə ümumxalq məhəbbəti qazanıb. Heydər Əliyev həmişə xalqın yaradıcı, qurucu gücünə inanırdı. Onun müdrik həyat fəlsəfəsi hər zaman gördüyü böyük işlərdə təzahürünü tapırdı.
“1993-cü ildə Heydər Əliyevin hakimiyyətə qayıtması ilə Azərbaycanda həyatın bütün sahələrində kəskin donuş baş verdi. Respublikada ictimai-siyasi sabitlik bərqərar oldu, parçalanma və dövlət çevrilişi təhlükəsi aradan qalxdı və hər şeydən mühüm olanı, Heydər Əliyev milli həmrəyliyə nail olmaqla öz doğma xalqını vahid ideologiya ətrafında birləşdirə, ona sabahkı günə inam hissi aşılaya bildi. Heydər Əliyevin müstəqil və sabit dövlət quruculuğu istiqamətində atdığı addımlar sayəsində Azərbaycanın milli maraqlarının keşiyində durmağa qadir olan Milli Ordu yaradıldı. O, monolit diaspor təşkilatlarının yaradılmasına böyük diqqət yetirirdi. Heydər Əliyev Azərbaycanın müstəqilliyinin qorunub saxlanılması üçün əlindən gələni əsirgəmirdi, 1994-cü ilin mayında isə Ermənistan-Azərbaycan, Dağlıq Qarabağ münaqişəsi zonasında atəşkəsə nail oldu. Ümummilli lider Ermənistan-Azərbaycan, Dağlıq Qarabağ münaqişəsinin sülh yolu ilə və ədalətli həlli üçün səy göstərirdi. Heydər Əliyev deyirdi: “Diplomatiya döyüş meydanı deyil. Burada opponentə aqressivlik deyil, mehribanlıq və etimad göstərmək lazımdır. Ehtirasa uymamaq, müdriklik və səbir nümayiş etdirmək, siyasətçilərin əlində vasitəyə çevrilməmək, müstəqil siyasi kurs yeridərkən səbirli və dözümlü olmaq lazımdır”. Azərbaycanın liderinin problemə bu cür yanaşma tərzi münaqişənin nizama salınması üzrə proseslərin optimal inkişaf modelini hazırlamağa və son nəticədə, Cənubi Qafqazın bütün qaynar nöqtələrində sülh perspektivini yaxınlaşdırmağa şərait yaratdı.
Sonda məqalənin müəllifi Arif Quliyev qeyd edir ki, Heydər Əliyev sovet hökumətinin ən yüksək rəhbərliyində təmsil olunduğu vaxtlarda Ukrayna üçün də çox işlər görüb.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
