Ulu öndər Heydər Əliyevin hakimiyyətə qayıdışı Azərbaycanı məhv olmaqdan xilas etdi
Lənkəran, 17 noyabr, Bağır Əliyev, AZƏRTAC
Yeni Azərbaycan Partiyası (YAP) Lənkəran rayon təşkilatının 1 saylı ilk ərazi partiya təşkilatında YAP-ın təsis edilməsinin 29-cu ildönümünə həsr olunmuş tədbir keçirilib.
AZƏRTAC-ın bölgə müxbiri xəbər verir ki, tədbir iştirakçıları Azərbaycan xalqının ümummilli lideri Heydər Əliyevin xatirəsini bir dəqiqəlik sükutla yad ediblər.
Toplantıda çıxış edən Lənkəran Şəhər İcra Hakimiyyəti başçısının müavini, YAP Lənkəran Rayon Təşkilatı Qadınlar şurasının sədri Rasilə Arifqızı partiyanın yaranma səbəblərini və həmin dövrün ictimai-siyasi vəziyyətini izah edərək bildirib ki, Azərbaycan 1990-cı illərin əvvəllərində uçurum qarşısında idi. Belə bir vəziyyətdə Azərbaycanın xilas yolunu ümummilli lider Heydər Əliyevin yenidən hakimiyyətə qayıdışında görən ziyalılar 1992-ci ilin oktyabrında Ulu Öndərin rəhbərliyi altında Yeni Azərbaycan Partiyasının yaranması təşəbbüsünü irəli sürdülər.
Xalqın səsini Ulu Öndərə çatdıran tanınmış ziyalıların bu müraciətinə müsbət cavab verən Ümummilli Liderin rəhbərliyi ilə 1992-ci ilin noyabrında Yeni Azərbaycan Partiyasının təsis konfransının keçirilməsi, daha sonra ulu öndər Heydər Əliyevin yenidən hakimiyyətə qayıdışı Azərbaycanı məhv olmaq təhlükəsindən xilas etdi. Ulu öndər Heydər Əliyevin siyasi varisi, Azərbaycan Respublikasının Prezidenti İlham Əliyev və onun ən yaxın silahdaşı, Birinci vitse-prezident Mehriban xanım Əliyeva böyük rəhbərin siyasətini uğurla davam etdirirlər.
Bölmənin digər xəbərləri
