QAN YADDAŞI
ULU ÖNDƏR HEYDƏR ƏLİYEVİN TƏŞƏBBÜSÜ İLƏ 20 YANVAR HADİSƏLƏRİNƏ SİYASİ-HÜQUQİ QİYMƏT VERİLMİŞDİR
Bakı, 19 yanvar (AZƏRTAC). Dövlət Sosial Müdafiə Fondunda (DSMF) 20 Yanvar faciəsinin iyirminci ildönümünə həsr olunmuş mərasim keçirilmişdir.
Tədbirdə DSMF-nin sədri Səlim Müslümov 20 Yanvar faciəsini ölkəsinin müstəqilliyi, ərazi bütövlüyü uğrunda mübarizəyə qalxmış Azərbaycan xalqına qarşı keçmiş sovet imperiyası tərəfindən törədilən misli görünməmiş cinayət kmi qiymətləndirmişdir. Bildirmişdir ki, keçmiş sovet rəhbərliyinin qanlı sifarişi ilə qətlə yetirilən Vətən oğul və qızları o dövrkü ölkə rəhbərliyinin və xalqı əliyalın küçələrə çıxmağa çağıran müxalifət nümayəndələrinin gözləri qarşısında şəhid olmuşlar. Yalnız xalqımızın ümummilli lideri Heydər Əliyevin Moskvadakı Azərbaycan nümayəndəliyinə gələrək Qanlı 20 Yanvar haqqında beynəlxalq aləmə məlumat verməsi, haqq səsimizi dünyaya çatdırması ilə bəşəriyyət bu faciədən xəbərdar olmuşdur. 1994-cü ildə isə ulu öndər Heydər Əliyevin təşəbbüsü ilə 20 Yanvar hadisələrinə siyasi-hüquqi qiymət verilmişdir.
Digər natiqlər şəhidlərin ölkəmizin azadlığı uğrunda tökdüyü qanın yerdə qalmayacağını vurğulamışlar.
Mərasimin sonunda ədəbi-bədii kompozisiya nümayiş etdirilmişdir.