Ulu öndər Heydər Əliyevin xatirəsi xalqımız və respublika veteranları tərəfindən daim əziz tutulur
Bakı, 4 may, AZƏRTAC
Ulu öndər Heydər Əliyev zamanın fövqündə duran, illər keçdikcə dühası və əzəməti daha parlaq şəkildə görünən qüdrətli şəxsiyyətlərdəndir. Görkəmli siyasətçi Heydər Əliyevin xatirəsi həm xalqımız, həm də respublika veteranları tərəfindən daim əziz tutulur.
AZƏRTAC xəbər verir ki, bu fikirlər ümummilli lider Heydər Əliyevin anadan olmasının 95-ci ildönümü münasibətilə mayın 4-də Azərbaycan Respublikası Müharibə, Əmək və Silahlı Qüvvələr Veteranları Təşkilatında keçirilmiş anım mərasimində səslənib.
Tədbirdə ümummilli lider Heydər Əliyev ilə birgə işləmiş, onun idarəçilik məktəbində yetişmiş dövlət orqanlarının yüksəkvəzifəli keçmiş əməkdaşları, eləcə də ziyalılar, İkinci Dünya, Qarabağ, Əfqanıstan müharibələri, əmək və Silahlı Qüvvələr veteranları və gənclər iştirak ediblər.
Əvvəlcə ulu öndər Heydər Əliyevin, Azərbaycanın müstəqilliyi və ərazi bütövlüyü uğrunda canlarından keçmiş şəhidlərimizin xatirəsi bir dəqiqəlik sükutla yad edilib.
Respublika Veteranlar Təşkilatının sədr müavini, ehtiyatda olan polkovnik Cəlil Xəlilov çıxış edərək xalqımız qarşısında tarixi və misilsiz xidmətləri olan ulu öndər Heydər Əliyevin mənalı həyatı və çoxşaxəli fəaliyyəti barədə geniş məlumat verib. C.Xəlilov bildirib ki, ümummilli lider Heydər Əliyevi xalqın yaddaşında, dövlətin tarixində əbədi yaşadan mühüm xidmətlərindən biri onun Azərbaycanın ən çətin zamanında xalqı və dövləti düşdüyü bəladan qurtararaq yeni inkişaf mərhələsinə çıxarmasıdır. Yüksək vəzifələrdə çalışan ümummilli lider Heydər Əliyev sovet dövründə Azərbaycana rəhbərlik edib, SSRİ dövlətinin tanınmış rəhbərlərindən biri olub. Ulu Öndər istər Azərbaycana rəhbərliyinin hər iki dövründə, istərsə də SSRİ rəhbərliyində çalışdığı illərdə daim ölkəmizin dinamik inkişafına, xalqın rifahına xidmət edib. Tarixi yaradan, onun gedişini dəyişməyə qadir insan kimi Heydər Əliyevin adı dünyanın ən böyük dövlət adamları olan Bismark, Atatürk və digər tarixi şəxsiyyətlərlə bir sırada çəkilir.
Azərbaycanın müstəqilliyinin ilk illərində üzləşdiyi dərin ictimai-siyasi, sosial-iqtisadi problemlərə, cəbhədəki uğursuzluğa, hakimiyyət böhranına, vətəndaş müharibəsi təhlükəsinə, xalqın azadlıq mübarizəsinə toxunan C.Xəlilov qeyd edib ki, belə ağır vəziyyətdə öz xalqının imdadına məhz ulu öndər Heydər Əliyev yetişdi. Dahi rəhbər xalqın təkidli dəvətini qəbul edib 1993-cü il iyunun 9-da Bakıya gəldi, bununla da daxili və xarici düşmənlərimizin bütün planlarını puça çıxardı: “Xilaskarlıq missiyasını üzərinə götürən Ulu Öndər vətəndaş qarşıdurmasının qarşısını aldı, ölkəni parçalanmaq təhlükəsindən qurtardı. 1993-cü il iyunun 15-də ulu ümummilli lider Heydər Əliyev Azərbaycan Respublikası Ali Sovetinin sədri seçildi. Bundan sonra Azərbaycan gələcəyə inamla baxan qüdrətli dövlətə çevrilmək yoluna qədəm qoydu”.
C.Xəlilov, həmçinin bu gün Azərbaycanın siyasi və iqtisadi sahədə qazandığı böyük uğurlardan, Ulu Öndərin siyasi kursunun layiqli davamçısı Prezident, Ali Baş Komandan İlham Əliyevin rəhbərliyi ilə regionun lider dövlətinə çevrilməsindən, dünyanın sürətlə inkişaf edən ölkələri sırasına çıxmasından danışıb.
Tədbirdə Prezident Administrasiyasının ictimai-siyasi məsələlər şöbəsinin məsul əməkdaşı Rasim Mirzəyev ulu öndər Heydər Əliyevin Azərbaycan dövlətçiliyində və azərbaycançılıq məfkurəsinin formalaşmasında mühüm rolundan söz açıb. R.Mirzəyev gənclərimizin ümummilli lider Heydər Əliyevin xidmətlərini daha yaxşı öyrənməsinin və bilməsinin vacibliyini vurğulayıb.
Ulu öndər Heydər Əliyevin hərbi məsələlər üzrə köməkçisi olmuş, hazırda Respublika Veteranlar Təşkilatının sədri, istefada olan general-polkovnik Tofiq Ağahüseynov çıxış edərək dahi şəxsiyyətin müasir Azərbaycan Ordusunun strukturunun, ixtisaslaşdırılmış ali hərbi məktəblərin yaradılması sahəsində gördüyü böyük işlərdən danışıb. Qeyd edilib ki, o dövrdə ali hərbi məktəbləri bitirmiş kadrların dövlət müstəqilliyinin bərpasından sonra Silahlı Qüvvələrin formalaşmasında mühüm rolu olub. Sonrakı mərhələdə Prezident İlham Əliyevin rəhbərliyi ilə bu işlər daha geniş miqyasda davam etdirilib. Hazırda Silahlı Qüvvələrimiz regionun ən qüdrətli ordusuna çevrilib. Bu gün dövlətimizin başçısı tərəfindən veteranlara qayğı siyasətinin əsası da ulu öndər Heydər Əliyev tərəfindən qoyulub və biz veteranlar bunu daim yüksək qiymətləndiririk.
Daha sonra sabiq neft emalı sənayesi naziri Kamil Akimov, sabiq kənd təsərrüfatı naziri Kamil Seyidov, veteranlar general-mayor Vladimir Timoşenko, general-leytenant İnayət Xəlilov, professorlar Bəhram Zahidov, Musa Bağırov və digərləri çıxışlarında müasir müstəqil Azərbaycan dövlətinin qurulmasında, inkişafında və dünyaya tanıdılmasında, ordu quruculuğunda, veteranlara qayğı siyasətində və peşəkar kadrların yetişməsində ümummilli lider Heydər Əliyevin tarixi xidmətlərindən və fəaliyyətindən bəhs edib, Ulu Öndərlə bağlı xatirələrini bölüşüblər.
Diqqətə çatdırılıb ki, dahi şəxsiyyət Heydər Əliyevin ideyalarına sadiq qalan gənclərimiz onun uğurlu daxili və xarici siyasətini inamla davam etdirərək, Azərbaycana yeni uğurlar qazandıran Prezident İlham Əliyevin ətrafında sıx birləşməklə ölkəmizin inkişafına, dövlət müstəqilliyinin qorunub saxlanılmasına töhfə verirlər. Prezident İlham Əliyevin fəaliyyəti nəticəsində Azərbaycanın uğurlu inkişaf yolu keçdiyi, gənclər siyasətində Ümummilli Liderin ideyalarının daim yaşayacağı çıxışlarda xüsusi vurğulanıb.
Sonda kinorejissor Vaqif Mustafayevin xalqımızın ümummilli lideri Heydər Əliyevin həyat və fəaliyyətinə həsr olunan beşinci filmi - “Tale” sənədli ekran əsəri nümayiş etdirilib.
Bölmənin digər xəbərləri
