Ulu Öndərin Azərbaycana rəhbərlik etdiyi illər dövlətçilik tariximizin parlaq mərhələsini təşkil edir
Qax, 10 may, AZƏRTAC
Ümummilli Lider Heydər Əliyev öz xalqını zamanın mürəkkəb tarixi-siyasi sınaqlarından uğurla çıxarmış və ardıcıl mübarizə apararaq onu müstəqilliyə qovuşdurmuş qüdrətli şəxsiyyətdir. Ulu Öndərin Azərbaycana rəhbərlik etdiyi illər dövlətçilik tariximizin parlaq mərhələsini təşkil edir. Davamlı yüksəliş yolunda inamla irəliləyən müasir Azərbaycan dövləti Heydər Əliyevin ideyalarının təntənəsidir.
AZƏRTAC-ın bölgə müxbiri xəbər verir ki, bu fikirlər Ulu Öndərin anadan olmasının 103-cü ildönümü münasibətilə mayın 10-da Qax şəhərində keçirilən ümumrayon tədbirində səsləndirilib.
Rayon rəhbərliyi və ictimaiyyətin nümayəndələri əvvəlcə Ümummilli Lider Heydər Əliyevin abidəsini ziyarət edib, önünə gül dəstələri düzüblər.
Rayon Heydər Əliyev Mərkəzində keçirilən elmi-praktik konfransın əvvəlində Dövlət Himni səsləndirilib, Ulu Öndərin və şəhidlərin xatirəsi bir dəqiqəlik sükutla yad edilib.
Sonra Ümummilli Lider Heydər Əliyevin həyat və fəaliyyətinə həsr olunmuş videoçarx nümayiş etdirilib.
Elmi-praktik konfransda rayon icra hakimiyyəti başçısının müavini – Ərazi-təşkilat və ictimai-siyasi məsələlər şöbəsinin müdiri Vəfa Heydərovanın “Heydər Əliyev müasir Azərbaycan dövlətinin memarı və qurucusudur” mövzusunda məruzəsi dinlənilib. Məruzədə Ümummilli Liderin mənalı ömür yolundan, Azərbaycanın inkişafı və tərəqqisi naminə misilsiz xidmətlərindən bəhs edilib. Bildirilib ki, tariximizin yetirdiyi ən böyük şəxsiyyətlərdən olan Heydər Əliyev təkcə Azərbaycan xalqının deyil, bütün dünya xalqlarının tarixinə daxil olub. Ulu Öndərin tariximizdə oynadığı rol illər keçdikcə daha dərindən dərk edilir, əsl qiymətini alır. Ümummilli Lider Heydər Əliyev Azərbaycan tarixində müstəqil və suveren dövlətin simvolu, cəsur insan, ən böyük vətəndaş kimi qalıb.
Konfransda YAP Qax rayon təşkilatının sədri Natiq Allahverdiyev, “Aztelekom” MMC-nin Şimal-qərb regional filialının rəisi Səxavət Rəşidli, şəhər 2 nömrəli məktəb-liseyin direktoru Aybəniz Məmmədova, müharibə iştirakçısı, ehtiyatda olan zabit Rahib Bayramov, Şəki-Zaqatala Regional Məşğulluq filialı Qax Xidmət şöbəsinin böyük mütəxəssisi Məhəmməd Tarverdiyev çıxış edərək, dahi rəhbərin həyat və fəaliyyətinin ən önəmli məqamlarından bəhs ediblər.
Qax Rayon İcra Hakimiyyətinin başçısı Elvin Paşayev çıxışında bu gün ölkəmizin əldə etdiyi bütün uğurların Ümummilli Lider Heydər Əliyevin adı ilə bağlı olduğunu vurğulayıb. Diqqətə çatdırılıb ki, Ulu Öndərin 1969-1982-ci illər ərzində ölkəmizə rəhbərlik etdiyi dönəm respublikamızın tərəqqi dövrü kimi yadda qalıb. Ümummilli Liderin xalqın təkidli tələbi ilə ikinci dəfə siyasi hakimiyyətə qayıtması xalqımızın çoxəsrlik tarixinə taleyüklü möhtəşəm siyasi hadisə kimi daxil olub, uğurlu dövlət quruculuğu prosesinin əsası qoyulub. Heydər Əliyev Azərbaycanı, sözün əsl mənasında, müstəqil ölkəyə çevirib, müstəqilliyimizi daimi və dönməz edib.
Qeyd olunub ki, Ulu Öndər Heydər Əliyevin müdrik siyasi kursunu uğurla davam etdirən Prezident İlham Əliyevin uzaqgörən siyasəti sayəsində indi Azərbaycan özünün ən qüdrətli dövrünü yaşayır. Qalib və nüfuzlu dövlət kimi öz sözünü deyən Azərbaycan beynəlxalq arenada yeni zirvələrə doğru mətin addımlarla irəliləyir.
Vurğulanıb ki, Ümummilli Liderin şah əsəri olan müasir müstəqil Azərbaycan dövləti Müzəffər Ali Baş Komandan, Prezident İlham Əliyevin rəhbərliyi ilə öz suverenliyini və ərazi bütövlüyünü qorumağa qadir olduğunu 2020-ci ildə 44 gün davam edən Vətən müharibəsi və 2023-cü ildə keçirilən lokal antiterror tədbirləri nəticəsində şanlı Zəfər qazanmaqla sübuta yetirib. Vətən müharibəsində qazanılan möhtəşəm Zəfər Ulu Öndər Heydər Əliyevin siyasi kursunun uğurlu davamının məntiqi nəticəsidir.
Konfransın sonunda rayonun ictimai-siyasi və mədəni həyatında fərqlənən şəxslərə Qax Rayon İcra Hakimiyyətinin fəxri fərmanları, həmçinin Yeni Azərbaycan Partiyasının sıralarına yeni qəbul olunan gənclərə üzvlük vəsiqələri təqdim edilib.
Ulu Öndərin anadan olmasının 103-cü ildönümünə həsr olunan rayon tədbiri “İçəribazar” Tarix-mədəniyyət kompleksində musiqili-bədii proqramla davam edib.
Müxbir – Mustafa Dadaşov
Bölmənin digər xəbərləri
