CƏMİYYƏT
Ulu Öndərin gənclərlə bağlı yaratdığı fəlsəfi ideyalar bu gün də aktualdır
![Ulu Öndərin gənclərlə bağlı yaratdığı fəlsəfi ideyalar bu gün də aktualdır](/files/2024/1/1200x630/1706882570653833590_1200x630.jpg)
Bakı, 2 fevral, AZƏRTAC
Müstəqil Azərbaycanın gənclər siyasətinin əsası Ulu Öndər Heydər Əliyev tərəfindən qoyulub. Ümummilli Liderimizin mükəmməl strategiyası əsasında müstəqilliyimizin ilk illərində gənclərin enerji və imkanları milli maraqlarımızın müdafiəsinə səfərbər edilib, onların vətənpərvər ruhda formalaşmasına zəmin yaradılıb.
Sağlam və vətənpərvər ruhda yetişən Azərbaycan gəncliyinin qəhrəmanlığı ilə torpaqlarımız işğaldan azad edilib, ərazi bütövlüyümüz tam bərpa olunub. Zəfərimizlə nəticələnən 44 günlük Vətən müharibəsində canından keçənlərin, şəhidlik zirvəsinə ucalanların əksəriyyəti torpağa, Vətənə sıx bağlı olan gənclərimizdir. Biz gənclərlimizlə fəxr edirik.
Bu fikirləri AZƏRTAC-a açıqlamasında Milli Məclisin deputatı, professor Kamilə Əliyeva söyləyib.
Deputat vurğulayıb ki, Ümummilli Lider Heydər Əliyev hər zaman Azərbaycan gənclərinə inandığını, dövlətimizin gələcək inkişafında onların üzərinə böyük məsuliyyət düşdüyünü qeyd edirdi. Bu gün gənclərimizin ölkənin siyasi, sosial-iqtisadi sahələrində mühüm vəzifələrə təyin olunması, onlara böyük etimad göstərilməsi Heydər Əliyev tərəfindən təməli qoyulan siyasətin davamıdır. Gəncləri “Azərbaycanın gələcəyi” adlandıran Heydər Əliyev onlara hər zaman qayğı göstərməyin vacibliyinə diqqət çəkirdi. Güclü demokratik dövlət quruculuğunda gənclərin rolunu düzgün qiymətləndirən Ulu Öndər bütün sahələrdə onlara böyük etimad göstərirdi. Ulu Öndərin gənclərlə bağlı fikirləri və onun yaratdığı fəlsəfi ideyalar bu gün də aktualdır. Müdrik şəxsiyyətin əsasını qoyduğu bu siyasi kurs hazırda uğurla davam etdirilir.
Dövlətimiz tərəfindən gənclərin rifahına xidmət edən bir sıra dövlət proqramlarının qəbul edildiyini diqqətə çatdıran K.Əliyeva deyib: “Bu proqramlardan “2007-2015-ci illərdə Azərbaycan gənclərinin xarici ölkələrdə təhsil üzrə Dövlət Proqramı” və “2019-2023-cü illər üzrə Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” xüsusi əhəmiyyət kəsb edir. Məhz bu proqramlar nəticəsində bu günə kimi 5000-dən artıq gənc dünyanın ən nüfuzlu ali məktəblərində təhsil alaraq ölkəyə qayıdıb. 2011-ci il dekabrın 19-da Gənclər Fondunun yaradılması gəncliyin inkişafında mühüm rol oynayıb. Fond tərəfindən indiyədək 4545 layihə maliyyələşdirilib”.
2013-cü il iyul ayından etibarən Gənclər üçün Prezident Mükafatının təsis edilməsinin əhəmiyyətini qeyd edən deputat bildirib ki, ölkədə ilk dəfə olaraq elm, mədəniyyət, o cümlədən ədəbiyyat və incəsənət, təhsil, gənclər siyasəti və gənclərlə iş, ictimai və sosialyönümlü fəaliyyət, innovasiya və sahibkarlıq fəaliyyəti sahələrində xüsusi fərqlənən gənclərə ildə bir dəfə Prezident Mükafatı verilir. Bu, gənclərə dəstək verilməsi istiqamətində mühüm əhəmiyyət kəsb edir. Həmçinin 2022-ci ildə "Gənclər xarici ölkənin nüfuzlu ali təhsil müəssisələrində təhsil almalarına dair 2022-2026-cı illər üçün Dövlət Proqramı" təsdiq edilib.
“Bugünkü Azərbaycan gənclərinin dünyagörüşü daha fərqlidir, dünyada gedən proseslərə yaxşı bələddirlər, eləcə də təhlil etmək qabiliyyətinə malikdirlər.
Azərbaycan gənclərinin inkişafına, müxtəlif sahələrdə nailiyyətlər əldə edən gənclərə Heydər Əliyev Fondu və Fondun prezidenti Mehriban xanım Əliyeva tərəfindən böyük dəstək göstərilir. Fond tərəfindən elm, təhsil, səhiyyə, mədəniyyət, ekoloji sahələrə aid proqram və layihələr hazırlanaraq həyata keçirilir. Heydər Əliyev Fondu ölkəmizlə yanaşı xaricdə yaşayan tanınmış, öz yüksək bilik və qabiliyyəti ilə seçilən və müvəffəqiyyət qazanmış gənc həmvətənlərimizə də böyük diqqət ayırır. Xarici ölkələrin tanınmış elmi-tədqiqat mərkəzləri ilə alimlərin mübadiləsini təşkil edir, ölkənin yaradıcı və elmi potensialının artırılmasına böyük köməklik göstərir”, - deyə Kamilə Əliyeva bildirib.