“UNİBANK” SB İPOTEKA LAYİHƏLƏRİNİN MALİYYƏLƏŞDİRİLMƏSİ ÜÇÜN KREDİT XƏTTİ ALMIŞDIR
“Unibank” Səhmdar Bankı (SB) ipoteka sahəsində layihələrin maliyyələşdirilməsi üçün kredit xətti alınması barədə saziş imzalamışdır. Banka 15 milyon ABŞ dolları məbləğində kredit xətti Niderlandın FMO (Nederlandse Financierings-Maatschappij Voor Ontwikkelingslanden N.V.) maliyyə şirkəti tərəfindən təqdim ediləcəkdir.
Bu kredit xəttinin vəsaitləri ipoteka obyektlərinin alınması, modernləşdirilməsi, təmiri və ya tikintisi sahəsində layihələrin maliyyələşdirilməsinə, eləcə də ipoteka kreditlərinin təkrar maliyyələşdirilməsinə yönəldiləcəkdir.
“Unibank”ın idarə heyətinin sədri Faiq Hüseynov demişdir: “Hətta dünyada maliyyə böhranı dövründə də xarici investorların bankımıza marağının və etimadının azalmaması bizim üçün çox vacibdir. Təkcə son aylarda “Unibank” ipotekanın maliyyələşdirilməsinin inkişafı üçün iki yeni kredit xətti almışdır. Bunlardan birini Beynəlxalq Maliyyə Korporasiyası, digərini FMO şirkəti açmışdır. Hər iki kredit xətti həm kreditorlar, həm də bank üçün sərfəli şərtlər cəlb edilmişdir. Bu, bizim müştərilərə münasib faiz dərəcələri ilə kredit verməyimizə imkan yaradır”.
İpoteka layihələrinin maliyyələşdirilməsi üçün FMO şirkətinin kredit xətti hər biri 7,5 milyon ABŞ dolları olmaqla iki bərabər tranş şəklində mənimsəniləcəkdir.
Xatırladaq ki, “Unibank” artıq iki dəfə FMO-dan kredit xətti almışdır. 2006-cı il dekabrın 11-də “Unibank” və FMO kiçik və orta sahibkarlıq layihələrinin maliyyələşdirilməsi üçün “Unibank”a 5 milyon ABŞ dolları məbləğində kredit xətti açılması barədə saziş imzalamışdılar. Elə həmin il dekabrın 13-də isə “Unibank” Azərbaycan bank sistemi tarixində ilk dəfə subordinasiyalı kredit almışdır. 5 milyon ABŞ dolları məbləğində subordinasiyalı kredit ikinci tərtib kapitalın formalaşması üçün əlavə mənbə olmuşdur.
FMO “Unibank”a ticarət layihələrinin maliyyələşdirilməsi üçün daha 1,5 milyon ABŞ dolları məbləğində limit ayırmışdır.
“Unibank” Azərbaycanın ən iri özəl banklarından biridir. Maliyyə göstərcilərinə görə liderlər üçlüyünə daxil olan bu bankın nizamnamə fondunun məbləği 15 milyon manata bərabərdir. Cari ilin birinci yarısının yekunlarına görə, bankın məcmu kapitalı 66,6 milyon manatdan çox olmuşdur. Onun aktivləri 479,4 milyon manat, kredit portfeli isə 358,8 milyon manatdır. Bankın rəsmi auditoru “PricevvaterhouseCoopers” şirkətidir. Səhmdarlar sırasına Avropa Yenidənqurma və İnkişaf Bankı və Almaniyanın DEG investisiya korporasiyası da daxildir.
