Universitetlərdə və kurslarda mövcud olan eyni ixtisasların tədris metodikasındakı fərqlər nədən ibarətdir?
Bakı, 13 mart, AZƏRTAC
Bəzi ixtisaslar həm kurslarda, həm də ali məktəblərdə tədris edilir.
AZƏRTAC bu ixtisasların tədris metodikasındakı fərqlər barədə təhsil ekspertlərinin fikirlərini təqdim edir.
Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının üzvü, Azərbaycan Gənc Alim, Doktorant və Magistrlər Cəmiyyətinin sədri İlqar Orucovun fikrincə, kurslarda 6 aya, yaxud 1 ilə müvafiq sahə üzrə yalnız hansısa vərdiş və bacarıqları öyrənmək olar. Lakin universitet təhsili konkret olaraq tələbəyə akademik bilikləri öyrədir.
“Universitet tələbəyə belə ixtisasların nəzəriyyəsini tədris edir, yəni tələbə burada ali təhsil alır. Həmçinin tələbə öz ixtisasında ən yüksək səviyyədə nəzəri bilikləri universitetdə ala bilir. Tələbəyə ixtisasın tarixi ilə bağlı proqram da öyrədilir və tələbə artıq mütəxəssis kimi formalaşır. Nəticədə universitet tələbəsi yüksək təhsilli mütəxəssis kimi yetişdirilir”, - deyə təhsil eksperti diqqətə çatdırıb.
İlqar Orucov bildirib ki, eyni ixtisas üzrə kursda və universitetdə təhsil alan şəxslərin bilik və bacarıqlarını eyni tutmaq olmaz. Lakin vurğulamaq lazımdır ki, müəyyən ixtisaslar, məsələn, kompüter elmləri və ya rəqəmsallaşma kimi ixtisasları 4 il universitetdə tədris etmək tələbənin zamanını almaq deməkdir. Amma bu o demək deyil ki, 1 il müddətində bu ixtisasları tələbəyə tam şəkildə öyrədə bilərik. Universitetlərdə bəzi ixtisasların tədris müddəti azaldıla bilər. Amma bu vaxtı azaltmaqla, əlbəttə ki, bilik öyrətmək olmayacaq.
“Kurs müəyyən ilkin bacarıqları verə bilər, amma universitet təhsili adından da göründüyü kimi, ixtisasla bağlı universal biliklər verir. Kursla universitetin müqayisəsi mümkünsüzdür. Lakin tələbənin universitetlə yanaşı, təkmilləşmək üçün müəyyən kurslara, yay, qış məktəblərinə üz tutması, eyni zamanda, ixtisasartırmada iştirak etməsi daha yaxşıdır”, - deyə İlqar Orucov fikrini yekunlaşdırıb.
Təhsil eksperti Qoşqar Məhərrəmovun fikrincə, əgər kimsə spesifik bir sahəni öyrənmək istəyirsə, bunun üçün 4 il universitet oxumağına ehtiyac yoxdur. İnsanlar həmin sahələri kurslarda da öyrənə bilirlər.
Ekspertin sözlərinə görə, universitet yalnız insana sosiallaşmaq imkanı verir, yeni dostlar və yeni çevrə qazanmaq üçün kömək edir. Həqiqətdə isə daha zəkalı tələbələr hələ universitetdə oxuyarkən işləməyə başlayırlar. Çünki bilirlər ki, orada tələbəyə gərəkli olan 2-3 fənn var və əsasən, onları öyrənməlidir.
Mütəxəssisin fikrincə, hazırda bir çox iş yerlərində bakalavr diplomu lazım gəldiyindən universitet təhsili önəmlidir. Amma artıq insanlar fərqindədirlər ki, universitet oxuyarkən də işləməli, təcrübə toplamalıdırlar. Eynən magistratura və doktorantura tələbələri də anlayırlar ki, tədqiqat və nəzəriyyə ilə məşğul olmaqla yanaşı, təcrübə toplamaq da vacibdir. Əks təqdirdə, müasir tələblərə cavab verməyəcək.
“Ümumilikdə isə hazırkı şəraitdə universitet və kurs təhsilinin hər ikisi lazımlıdır. Tələbələr universitetdə oxuyarkən tam olaraq nə istədiklərinə qərar verməli, özlərini tanımalı və kəşf etməlidirlər. Məqsədlərini müəyyənləşdirdikdən sonra kurslara müraciət etmələri daha doğru olar”, - deyə Qoşqar Məhərrəmov fikrini yekunlaşdırıb.
Bölmənin digər xəbərləri
