“UŞAQ EVİNDƏN SONRA” MÖVZUSUNDA OLAN MÜSABİQƏNİN QALİBLƏRİ MÜKAFATLANDIRILMIŞLAR
Bakı, 7 oktyabr (AZƏRTAC). Oktyabrın 7-də Azərbaycan Media Mərkəzində “SOS Uşaq Kəndləri - Azərbaycan” Assosiasiyası və Gənclər və İdman Nazirliyinin birgə təşkil etdiyi uşaq evlərini, internatları, alternativ qayğını tərk etməkdə olan və tərk etmiş gənclərlə bağlı kampaniya çərçivəsində jurnalistlər arasında “Uşaq evindən sonra” mövzusunda olan müsabiqənin qalibləri mükafatlandırılmışlar.
Gənclər və İdman Nazirliyinin nümayəndəsi Nərmin Bağırova bildirmişdir ki, məqsəd cəmiyyətin diqqətini uşaq evlərində, internatlarda yaşayan gənclərin problemlərinə yönəltməkdir.
“SOS Uşaq Kəndləri - Azərbaycan” Assosiasiyasının direktoru Fərqanə Məmmədova məlumat vermişdir ki, müsabiqəyə uşaq evləri, internatları tərk etməyə hazırlaşan gənclərin müstəqil həyata hazırlanması, onların təhsili, iş, mənzil və digər problemlərinin həllinə dair mətbuatda dərc olunmuş, radio və televiziyalarda yayımlanmış araşdırma xarakterli 27 iş təqdim olunmuşdur.
Vurğulanmışdır ki, bu kampaniya 2011-ci ilədək davam edəcəkdir.
Sonda qaliblərə pul mükafatı və diplomlar təqdim olunmuşdur.
Bölmənin digər xəbərləri
